Tungod sa kainit bisa’g bag-o pang naniudto ang managtiayong Celso ug Nova, nanulod sila sa Chow King sa Pacific Mall, aron mo-order og haluhalo. Dihang gitagaan na sila’g numero sa ilang lamesa aron maghulat ihatud ilang gi-order, nangutana si Nova ni Celso.
“Unsa pa may gusto nimong orderon?” nangutana si Nova sa iyang kapikas.
“Pineapple juice,” tubag ni Celso. Naisang kila’y ni Nova. Nangunot iyang agtang. Nagtutok sa iyang bana.
May negosyo nga karenderya ang bana’g asawa sa ilang balay sa Sitio Buwaros. Mga subra napulo ka tuig na silang minyo.
Apan wa pay anak. Si Celso ang tigkompra sa ilang lotoonon matag kaadlawon. Si Nova ang tigluto inabagan ni Celso. Molutaw nga mura’g under de saya si Celso, kay mao may madali nga sugosugoon sa asawa.
“Nganong pineapple juice man?” ni Nova nga wa kauyon sa gustong orderon sa bana.
“Haluhalo may atong kaunon. Sa ato pa sagulsagol. Inig human nako’g kaon og haluhalo, uhawon pa man ko. Pineapple juice akong gustong imnon. Isagol nako sa haluhalo sa akong tiyan ang pineapple juice,” ni Celso.
“Ayaw ana. Di ko gusto kana imong orderon!” ni Nova.
“Maayo pa wa ka na lang mangutana kun unsay akong gusto. Kay ikaw man diay gihapoy magbuot sa akong gusto. Hasta dinhi’s kan-anan, ipalutaw man gihapon nimo akong pagka-under de saya!” bagulbol ni Celso. Nagmug-ot. Niabot na ilang haluhalo. Wa na ganahing mukaon.
“Na hala. Order didto’g pineapple juice! Ikaw lay linya,” ni Nova nga nitunol og kuwarta sa bana.
“Ay na lang. Maglisod man gani ta’g hurot ining haluhalo,” ni Celso. Kay tapolan sab kaayo siya nga molinya. Ang magtiayon way anak. Dali rang magkalalis. Ug magluoray. Apan dali ra sang magpasinsiyahay. (Kataposan)