Panumpa nga bakak

Gula 1

Naglakaw si Jeffrey sa P. Burgos Street gikan nga misimba sa Basilica del Santo Niño. Paspas ang iyang paglakaw kay init na kaayo ang adlaw niadto’ng higayuna nga hapit na ang alas 12 sa udto.

Kalit lang nga may miduol nga babaye kang Jeffrey. “Puwede mangutana? Asa dapit ang Comelec?” matud sa babaye. “Naa ra diha o,” gitudlo ni Jeffrey ang building nga nahimutangan sa Comelec.

“Mo-transfer man gud ko’g parehestro dinhi sa Cebu City,” matud sa babaye nga misugod na og pahiyom kang Jeffrey. “Aw duha ra ba kana ka opisina sa Comelec, north ug south, asa ka nagpuyo?” ni Jeffrey.

“Sa Mabolo ko karon nag-estar,” matud sa babaye. “Aw sayon ra, duola lang si Atty. Marchel Sarno, siya maoy election officer sa north district. Gusto ka nga akong ubanan?” dason ni Jeffrey ngadto sa babaye.

Mipahiyom ang babaye nga nakadungog sa tanyag ni Jeffrey nga ubanan niya pag-adto sa opisina sa Comelec. Hinay-hinay sila nga mitabok sa karsada paingon sa opisina sa Comelec.

“Taga Leyte g’yud ko pero dia na ko mag-eskuwela sa Cebu. Kapoy na kaayo nga mopauli pa g’yud sa Leyte atol sa eleksyon mao nga magpa-transfer na lang ko dinhi,” matud sa babaye.

Nagpaila si Jeffrey ngadto sa babaye. Mipahiyom ang babaye nga mitug-an nga siya si Janeth, nagtungha sa University of the Visayas sa kurso nga education.

Pagtangka nila sa pultahan sa Comelec, giingnan sila nga mag-lunch break pa ang mga kawani ug mobalik sa ala-una na sa hapon. “Wala g’yud ta’y suwerte Neth, mag-lunch na lang usa ta,” agda ni Jeffrey. (Sumpayan)