Gula 13
Naghinilakay sila’ng duha si Loreto ug Evelyn. Ginudnod ni Evelyn ang iyang nawong sa dughan ni Loreto nga igo lang mihapuhap sa buko-buko ug sa ulo sa dalaga. “Ayaw ko’g biyai Nong Retz. Dili nako makaya kun wala ka kanako,” misamot kahugot ang gakus ni Evelyn kang Loreto.
“Mosugot ko Retz nga human sa akong gradwasyon, magpakasal ko nimo. Basta ayaw lang g’yud pagbiya, dili ta magbuwag,” matud ni Evelyn nga ingon sa nagpakiluoy kang Loreto. Wala makapugong si Loreto sa paghawok sa dalaga.
“First time ko pa kini nga paghawok og babaye nga akong gihigugma,” giingnan ni Loreto si Evelyn dungan sa pagbuhi sa usa ka pahiyom nga sa katapusan wala siya mapakyas sa una ug katapusan niya’ng gugma.
“Una pa usab kini nga higayon nga adunay lalaki nga nakahawok sa akong aping Retz,” matud ni Evelyn. Diha pa sila makabantay nga wala diay nila matak-op pag-ayo ang pultahan sa kuwarto ni Loreto.
Gidali-dali pagsirado ni Loreto ang pultahan sa iyang kuwarto sa kabalaka nga makit-an sila sa tiguwang nila nga kusinera. “I love you Lyn,” giingnan ni Loreto ang dalaga samtang anam-anam nga giukoban niya ang mga ngabil ni Evelyn.
“Tinuod g’yud ha? Ayaw na pagbiya dinhi? Ikaw maoy akong inspirasyon sa pagtungha Retz kay gusto ko nga ipakita kanimo nga wala ka mag-usik sa imong kuwarta paggasto kanako sa pagpatungha,” ni Evelyn.
Gipasaligan ni Loreto si Evelyn nga dili na siya mobiya dinhi sa Sugbo. “Kun mahitabo man nga mobiya ko dinhi sa Sugbo, uban ka kanako Lyn. Palambuon ko pa ang akong negosyo karon nga may umaabot na ako nga asawa,” matud ni Loreto nga gihakop sa tumang kalipay.
Nag-ukobay na usab ang ilang mga ngabil samtang hugot kaayo ang masi’g nila ka mga gakus. “Tana uy, moadto na ta sa kan-anan kay basi masakpan unya ta dinhi ni Nang Dading,” ni Evelyn. (Sumpayan)