Paspas ang pagpangligid sa panahon hangtud nga talitapos na si Evelyn sa iyang pagtungha sa koliheyo. Hingpit na usab nga nahimo’ng dalaga si Evelyn ug nagbaton kini og talagsaong kaanyag. Diha’y higayon nga gisukna ni Loreto ang dalaga kun may boyfriend na ba siya. Giingnan ni Evelyn si Loreto nga gitingob niya ang iyang pagtagad sa pagtoon aron nga dili mausik ang pagtabang kaniya sa ulitawo’ng guwang.
“Suwerte kaayo ang makapanag-iya nimo Evelyn kay gawas nga maanyag ka, buotan pa g’yud ug hapit na makahuman sa kurso nga commerce,” ni Loreto pa nga mitutok sa dalaga.
Mipahiyom si Evelyn ug nagpasalamat kang Loreto sa dako kaayo nga natabang niini ngadto kaniya. “Wala ko masayod unsaon nako pagbayad ang natabang nimo kanako Nong Loreto. Kun wala ka pa, dili g’yud ko makapadayon pag-eskuwela sa college,” ni Evelyn.
Buhong g’yud kaayo si Evelyn sa iyang mga panginahanglanon sa tunghaan kay anaa man dayon si Loreto nga mohatag. Ikaw Nong Retz, ngano’ng wala ka pa man g’yud magminyo? Tan-aw nako nimo kapin ka na sa 40 ang imong pangedaron,” matud ni Evelyn. Nakalitan si Loreto kay wala siya magdahom nga moabot ang higayon nga mangutana si Evelyn kaniya og ingon niini.
Wala dayon siya makatingog ug igo lang mitutok kang Evelyn. Naghuna-huna si Loreto ug pagka taud-taud. “Ang babaye nga gusto nako nga ikauban sa tibuok ko’ng kinabuhi mao ang susama kanimo kaanyag ug susama usab kabuotan.”
Naandan na nga si Evelyn maoy motawag ni Loreto kun makaandam na ang ilang kusinera sa ilang pagkaon. Pag-adto ni Evelyn sa kuwarto ni Loreto, iyang nakita nga nagsul-ob kini’g sweeter ug ingon sa maluyahon ang panglawas. (Sumpayan)