Jezebel

Gula 197

Gitug-anan nako si Edward nga nabiktima ko sa rape ug nabangalan ko ni James sa daplin sa dalan ug gidala ko ni James sa ilang pinuy-anan.

Mitrabaho ko isip katabang ug nangulitawo si James nako bisan usa lang ko ka katabang.

Giingnan nako si Edward nga sanglit wala na ko maglaom nga magkadayon pa kami, gisugot nako si James ug gikatugyan ko ngadto kaniya ang akong pagkababaye.

Gisuginlan ko usab si Edward bahin sa gibuhat ni Red kanako. Mibati’g kaluoy si Edward nako. “Karon nga nasayod ka na sa tanan, mahigugma ka pa ba gihapon nako, Edward?”

“Ang tanan ko’ng nasayran wala makapausab sa akong pagmahal kanimo, Jezebel,” nagkanayon si Edward. “Biktima ka lang sa sungog sa kahigayonan.”

‘E-Edward...” Mao ray akong nalitok kay ingon sa dili ko makatuo sa iyang gipamulong. “Bisan ako aduna sa’y angay itug-an nimo, Jezebel.”

“U-unsa kana, Edward?” gisukna ko siya. Mitug-an si Edward kanako nga diha’ng kalit lang ko’ng nahanaw didto sa Bohol, nakasala usab siya sa among relasyon.

Aron paglingaw sa iyang kaugalingon, nakigrelasyon siya sa lain-laing mga babaye. Sulod lang sa kapin usa ka bulan, nakauyab siya’g tulo ka babaye. Pulos niya nakuha ang pagka babaye sa iyang mga nauyab. (Sumpayan)