Adunay panultihon nga nag-ingon nga ang kawad-on dili babag sa kalampusan sa usa ka tawo. Kana posible kun imong himuon kanang tumong inubanan sa kakugi.
Bata pa kaayo si Ronel, gusto na niyang mahimong usa ka seaman. Sa dihang natapos na iyang kindergarten, didto sa ibabaw sa stage gipangutana siya sa iyang magtutudlo. “Unsa man ang imong ambition Ronel.”
“Gusto ko mahimong seaman ma’am.” Tubag ni Ronel.
“Nganong gusto ka man mahimong seaman.” Apas pangutana sa magtutudlo.
“Gusto kong mahimong seaman ma’am kay gusto kong makatabang sa akong pamilya.”
Tungod sa kabata pa ni Ronel sayon ra kaayo niyang gilitok ang iyang gusto. Wala siya masayod kun pila ang mahimong magasto aron mahimo kang seaman. Kabos ang ilang kahimtang ni Ronel ang iyang papa nag-drive og traysikad. Samtang ang iyang mama nag-atiman sa balay. Mao nga dili sayon ang pagkatuman sa iyang pangandoy. Ang ilang kakabos wala kini makababag sa pangandoy ni Ronel.
Sa high school na siya, wala niya wagtanga ang kasibot sa pagtungha, kugihan siyang magtuon sa iyang mga leksiyon ug sa pagbuhat sa iyang mga project. Tungod sa gipakitang kakugi uban sa kahait sa iyang salabotan nigraduwar si Ronel uban ang mga pasidungog. Human sa graduwasyon gipangutana siya sa iyang magtutudlo, “Ronel unsay kursong imong kuhaon sa kolehiyo.” “Nautical unta ma’am, apan imposible kaayo ma’am, nahibalo man ka ma’am nga kami kabus lang intawon,” tubag ni Ronel.
“Aw maayo kaayo Ronel nga nisulti ka nako nianang imong problema. Duna koy nahibaw-an nga ahensiya nga nagrekrut og mga estudyante aron makatungha og Nautical. Ako’y morekomendar nimo para sa imong physical ug mental examination.”
Nakapasar si Ronel sa physical ug mental examination. Mao nga nakapadayon siya sa pagtungha isip scholar sa maong ahensiya. Human usab sa upat ka tuig nga pagtungha natapos ra ni Ronel ang maong kurso. Karon usa na siya ka seaman. Iyang gituman ang iyang mga saad nga tabangan ang iyang pamilya. Natuman usab niya ang iyang pangandoy nga makalibot sa kalibutan.
Ang kaagi ni Ronel nagpamatuod lang nga ang kawad-on dili babag sa kalampusan, kun uban sa kakugi ug pagkamainantuson. (Kataposan)