Handumanan sa adlaw sa gugma

Ning kasaulogan sa Valentine’s Day, malipayon kaayo nga nangyaka ang magtiayong balikbayan nga sila si Alex ug Zeny sa lunhaw’ng bermuda sulod sa matahom na kaayo nga Plasa Independencia. Miliraw ang ilang panan-aw sa tibuok palibot sa plasa, nga kanhi, maoy paborito nilang suroyanan sa ilang kabatan-on nga manag-uyab pa sila.

“Pagkatahom na gayud sa Plasa Independencia, Zen...!”

“Bitaw, Lex! Lahi na kaayo kay sa kaniadto....!”

“Labong sa kasagbutan pa ang tibuok plasa kaniadto, Zen...!”

“Mga bombil ug kabugangan ang nanuyhakaw sa Plasa Independencia sa matag deyt nato kaniadto, Lex...!”

“Pila na ba ka tuig nga wa na ta makabalik dinhi sa siyudad sa Sugbo, Zen...?” “Almost fifteen years na, Lex! Parehas na gud nga 40 anyos na tang duha ron! Unsaon nga tua na man ta’s Canada manimuyo...!”

“Yes! Gipares gyud ta’s Ginoo, Zen! Ako nga usa ka licensed civil engineer ug ikaw usa ka licensed nga arkitekto...!”

“And we are blessed with three children nga buotan, Lex...!”

“Ning atong pagbakasyon sa siyudad sa Sugbo, Zen, sa pagduaw ta’s eskuwater nga dapit sa atong Barangay Lorega San Miguel, nindot handumon ang kanunay tang panagdeyt kaniadto dinhi sa Plasa Independencia...!”

“Bitaw, Lex! Ang atong handumanan sa adlaw sa gugma dinhi sa Plasa Independencia...!”

“Lalim bay white rabbit ug cotton candy ra gayud atong masimasima sa atong panagdeyt kanhi, Zen...!”

“Nahinumdom ko, Lex, nga ilawom sa labong punoan sa bombil ta magtago kaniadto...!”

“Oo, Zen! Ug wa tay tihiktihik nga magginaksanay ug maghinalokay ilawom sa punoan sa bombil....!”

“He-he-he! Wa say puas tang rinubohay ug romansahay, nakapanimaho ta’g baho kaayo sa atong palibot, Lex....!”

“Kay parehas tang nakahiram sa hugaw sa tawo, Zen....!”

Ug dungan nga nanindog sila si Alex ug Zeny gikan sa ilang paglingkod ug pagyaka sa lunhaw’ng bermuda. Nangatawa silang duha nga naghunahuna sa ilang handumanan sa matahom na nga plasa. Malipayon nga nag-agbayay sila si Alex ug Zeny nga milibot pagsuroy sa tibuok palibot sa Plasa Independencia atol sa kasaulogan sa adlaw sa gugma, nga nahimo nang tipik sa ilang kagahapon sa pagkabatan-on pa nila. (Kataposan)