Pebreo 14. Adlaw sa gugma. Linaw ang panahon nga miduyog sa kalipay nilang Pete ug Sally alang sa bunyag sa una nilang liwat. Unang tuig usab sa anibersaryo sa ilang kasal. Samtang nagpaabot sila sa pari nga mamunyag misawom ang hunahuna ni Sally sa nangagi.
“Pete, tumanon gani nimo, ang gusto sa atong ginikanan, dili nako moila nimong higala,” bahad ni Sally.
“Mao sab kanay bation nako nimo,Sally, kon paundayunan nimo, ang gusto sa atong mga ginikanan, mabugto ang atong panaghigala,” balos ni Pete.
Gusto sa ilang mga ginikanan nga silang duha maoy magkadayon. Apan bisan suod nga higala silang Pete ug Sally tungod kay gikan sa gagmay pa silang bata barkada na sila, pero lahi ang dagan sa ilang kinabuhi.
Pareho silang duha nga silahis. Lalake ang uyab ni Pete ug babaye ang uyab ni Sally. Apan sila rang duha ang nasayod sa ilang kahimtang.
“Pete, gikatakda naman sa atong ginikanan ang atong kasal, unsa may maayo natong buhaton?” sukna ni Sally.
“Ato na lang silang paundayunan, Sal, unya human sa kasal, atong gusto mao gyuy atong tumanon,” ni Pete.
Sa gabii human sa ilang kasal, nangatawa silang Pete ug Sally nga misulod sa ilang lawak. Apan ang katugnaw sa aircondition maoy mihari sa ilang lawak.
Way nahimo si Pete ug Sally aron mabuntog ang kabugnaw. Gakos maoy nabuhat ni Sally ngadtong Pete ug mibawos si Pete nga miduslit sa ilang tawhanong kahinam.
“Kon gipaundayunan pa nato ang atong kabuang, Pete, wala untay anak nga atong maangkon,” ni Sally.
Tam-is ang tinuod nga gugma, Sally,” balos ni Pete.(Kataposan)