Rehistro sa sakyanan

Disyembre 10. Alas 10:00 sa buntag. Sulod sa buhatan sa LTO nga nahimutang sa SM City. Nilinya si Atty.  Rex Endab kay magpa-renew sa iyang lisensiya sa pagmaneho. Sa sunod adlaw, birthday niya ug mo-expire na ang iyang lisensiya. Nakasandurot niya ang lainlaing matang sa tawo. Pero bisan lainlain sila, dunay usa ka butang nga komon nila. Kamao silang modrayeb og gusto pang modrayeb. May mga batan-on, tiguwang, babaye, ug lalaki. May tambok, may niwang. May pobre. May adunahan.

“Maayo unta’g lifetime na ang lisensiya. Wa na lay renew-renew” komentaryo sa lalake nga singkwentahon ang pangedaron. Daw katalirungan ni Rex. Nagbarog ang lalaki sa atubangan niya. Nilingi sa ubang mga tawo. Naghulat kun may motimang sa iyang gipamulong. Dugay’ng way nitingog. “Unya, panguwarta man na sa atong gobiyerno matag tulo ka tuig?” ni Rex. Siya na lang ang nisakgaw. “Mosugot ko. Bayad ta kada tuig og bayranan sa lisensiya. Puwede tawgon nato og driver’s due. Basta di na lang ta molinya og tagtulo ka oras. Kapoy kaayo” sa tawo.

“Uyon ko sa imong sugyot. Pahimoan nato og balaod sa Kongreso?” ni Rex. “Maayo unta’g dunay mo-isponsor. Kana sab ang rehistro sa sakyanan matag tuig. Hasol sab kaayo” sa tawo. “Unsa may imong sugyot?” ni Rex. “Dapat bayad lang ta kada tuig og transportation due o vehicle due. Kausa lang irehistro dapat ang sakyanan. Iparehistro lang pag-usab kun dunay transfer of ownership nga pagahimoon. Ang tawo bitaw, kausa ra man irehistro. Sa pagkahimugso man lang. Di man kada tuig sa tawo.

“May ponto ka diha, sir. Gani, maminusan ang trabaho sa gobiyerno ug konsumo sa papel” ni Rex. Wa lang una siya nagsaba nga abogado siya. Kay nagdali siyang maka-renew og lisensiya. Inig kahuman niya, ilailahon niya ang tawo. Basin dunay oportunidad magamit  iyang serbisyo mahitungod sa ideya sa tawo.