Gugma sa bitin

“Tuguti nga akong lapason ang atong gikasabotan Kenn. Dili na g’yud nako kapugngan pa ang akong kaugalingon,” giingnan ni Roland si Kenneth diha’ng gigakus na niya’g maayo ang dalaga.

Gikan nga nagtakilid, mihayang si Kenneth ug milingi kang Roland. “Daan pa g’yud ko nga dili ka makapugong sa imong kaugalingon. Mabiktima g’yud ko ani ron unya imo lang talikdan,” ni Kenneth pa nga mitutok kang Roland.

Gipasaligan ni Roland ang dalaga nga dili kini niya talikdan. “Andam ko nga manubag sa akong kaakohan kanimo Kenn,” matud ni Roland nga misugod na sa pagpabatyag og kahinam kang Kenneth. Gihapuhap niya ang kalawasan sa dalaga.

Nakasugnib kini og dugang pa nga kahinam kang Roland. Sa una nga higayon gipatikan og hawok ni Roland si Kenneth sa iyang aping, dayon giukoban na niya ang mga ngabil sa dalaga.

Gipasagdan ni Kenneth nga miparayeg pag-ayo si Roland kaniya. Taud-taod, mialayon na si Kenneth sa pakigparayganay kaniya. Nahimo’ng mainiton na ang ilang mga parayeg sulod sa mabugnaw’ng lawak sa hotel.

“Ikaw ang babaye nga dali ra kaayo higugmaon Kenneth,” hagawhaw ni Roland ngadto sa dalaga samtang anam-anam niya nga gipanangtang ang iyang mga sapot.

Taud-taod, hingpit na nga giangkon sa hingpit ni Roland si Kenneth. Gitagbaw ni Roland ang iyang kaibog sa maanyag nga dalaga nga sa daklit lang iyang gikarelasyon.

Milanat og mga tunga sa oras ang wala’y hunong nila nga pagparayganay. Nakatulog si Roland tungod sa kakapoy sa ilang kumbati sa kama. Nakapahiyom si Kenneth nga nagsud-ong ni Roland nga gikapoy pag-ayo.

Samtang naghagok na si Roland, wala matulog si Kenneth ug hilom kini nga mikuha sa pitaka sa iyang gikadulog. (Sumpayan)