Ang mangtas nga daut

Dinhi sa sityo Lungag-Kagang dunay usa ka tawo nga daut apan may talagsaong kusog ug kining tawhana mao si Muking. Nagpangedaron kini si Muking og bayente dos anyos ug kun imong tan-awon nga maglakaw lagmit gyud mapukling sa hangin apan dugay na siya nga ingon niini.

Wala man siya’y sakit. Dunay nag-ingon nga si Muking nasakit og tisis apan may nag-ingon nga ang sakit ni Muking usa ka tisis sa bukog kay daut man gyud kaayo siya. Apan makapahibulong kay hilabihan ka kusgan. Moalsa siya’g binandahan nga sako nga puno sa kopras. Ug mga dagkong sinako sa bugas.

Ug diha gani kausa nga nakabuhi ang turong baka ni Ingko Niyong ug dili gyud magpadakop nga nagdagandagan na lang libot sa sityo, si Muking man ang nakadakop pinaagi sa paglutos sa toro ug unya gikuptan ang ikog niini ug iyang gibalikos sa punoan sa buongon. Ug maong nadakpan kini pagbalik.

“Kusgana anang Muking, uy, Damian,” ni Cosme pa ngadtong Estong nga mamalitay og baka. “Kakita gyud ko nga gialsa niya ang dakong pinutol nga punoan sa tugas ug gidala sa ilaha.”

“Di ba gitibi na man na siya,” ni Damian pa.

“Maoy sulti nila, pero, wala man lagi mag-ubo-ubo nga kasagaran sa mga  dunay sakit nga tisis magsige mag ubo-ubo,” tubag ni Cosme.

Ug milabay ang daghang mga adlaw, dihay kalit lang nga mitumaw nga mangtas nga ungo nga magsige’g wakwak matag gabii. Nahadlok ang mga lumolupyo, apan misamot ang ilang kahadlok dihang dunay grupo sa mga tulisan nga diha mopuyo sa balay ni Mr. Gundo nga contractor og mga bilding ug mga balay. Gani duna na may gitulis dinhi sa ilang dapit ug kini mao ang dato nga insek nga si Achong. Milyon ka pesos ang natulis sa mga tulisan ug sila si Achong gigapos nga pinatuwad.

“Ako’y modakop anang mga tulisan,” ni Muking pa ngadto sa mga tanod. Ug sila si Damian ug Cosme naminaw sa pahayag ni Muking.

“Ayaw, King, kay mga armado ra ba na sila,” pahimangno ni Cosme.

“Ahhh,di ko moila’g armas basta ako’y maglagot,” ni Muking pa nga wala motan-aw nilang Damian ug Cosme.

Pagkabuntag hipalgan ang patay’ng lawas sa walo ka  tulisan nga wala nay mga tinai ug kasingkasing ug ang kuwartang ilang natulis, bisa’g nakuhaan na, nahibalik sa insek.

Ug unya nadungog nga si Muking nagpabunyag sa iyang panganay nga anak ug dako kuno  ang hikay. (Kataposan)