Positibo’g panghunahuna

Asa man diay ka padulong adto? Kadtong nagkita ta sa Escario. Nagbisiklita ka. Ako nag-hike” ni Atty. Rudy Gomez, mahigalaon nga abogado. Motagad bisa’g kinsa.

Sekyu si Freddie sa Palace of Justice sa Mandaue. Alas 8:30 ron sa buntag.

Nidalikyat og pakighinabi ang abogado ni Freddie dihang gipasulod ni Freddie sa pultahan sa bilding sa mga husgado. Nakapanglab-ok og laway si Freddie. Maulaw siyang mosulti sa tinood, sa abogado.

Naa’s Capitol Site magpuyo si Freddie uban sa iyang kapikas ug duha ka gagmay pang mga anak. Si Atty. Gomez nagpuyo sa Guadalupe. Kada alas sayis sa buntag makit-an ni Freddie nga mag-hike ang abogado, samtang magsakay si Freddie sa iyang bisiklita. Ganihang alas sayis nakakita sab ang abogado niya. Ug nitimbaya gyud niya.

Sa paminaw ni Freddie, dili man mapahitas-on ang abogado. Motagad man og mga kabos. Nakahukom siyang mosulti na lang sa tinood.

“Alas siyete man akong duty dinhi, attorney. Kadtong nagkita ta, padulong na ko dinhi” ni Freddie. Maulawon. Kay sa iyang hunahuna, ubos kaayo ang tawo nga magbisiklita lang padulong sa trabahoan.

Nisidlak ang mga mata sa abogado. “Very good hinoon imong gibuhat! Two birds in one stone!” sa abogado. Sanag ang panagway.

“Ngano man attorney?” ni Freddie. Wa kaayo kasabut.

“Sa imong usa ka lihok, duha ang kaayohan. Nakadaginot ka pa sa pletehan, naka-exercise ka pa” sa abogado. Mapahiyomon siyang nipikpik sa abaga ni Freddie. Unya nipadayon sa iyang lakang padulong sa husgado.

Nakaamgo si Freddie nga dili diay siya angay maulaw sa iyang gibuhat. Nahimuot siyang nisunod og tan-aw sa bukobuko sa abogado nga naglakaw.

“Nindot unta ang tanang abogado, sama niya nga positibo og panghunahuna” tuaw ni Freddie sa hilom. (Katapusan)