Jezebel

Gula 168

Tulin nga nanglabay ang mga adlaw. Mitangkod na nga usa ka bulan nga si Red nagpadayon sa pagpahimulos sa akong pagkababaye.

Dili ko makatutol sa iyang buhaton nako kay modayon man siya’g bahad nga tug-anan niya si Mrs. Lim sa relasyon namo ni James kun magdumili ko sa gusto niya’ng buhaton.

“Hangtud kanus-a man kutob ang pagpahimulos mo kanako, Red?” Gipangutana ko siya usa ka gabii niana.

“Hangtud nga gusto pa ko’ng modimdim sa imong katam-is, Jezebel,” niya pa. Milabay ang duha ka bulan. Samtang si Red nagpadayon pagpahimulos sa akong pagkababaye ug si James wala na gayud mo-text kanako.

Maoy katapusan namo’ng pagbayloay og text messages niadto’ng iyang paglarga paingon sa Amerika. Sukad niadto, wala na gayud ako makadawat og text gikan niya.

Nagmingaw na ang akong cellphone. Misantop sa akong hunahuna nga tingali’g nakareyalisar si James nga dili gayud kami alang sa usa’g-usa.

Sakit alang kanako kun mao man ugaling kini ang desisyon ni James. Apan dawaton ko ang kamatuoran bisan sakit sa akong balatian.

Nakakat-on na ko paghigugma kang James apan sukad kami nagkarelasyon, daan na ko’ng wala maglaom nga makabaton og katumanan ang among gugma. (Sumpayan)