Sa adlaw sa Pista Senyor, naatol gyud nga nagkabagat ang magkaribal nga duha ka grupo sa fraternity sa dalan Magallanes nga wala mahiapil sa rota sa mga Sinulog contingents sa siyudad sa Sugbo. Ang usa ka grupo gipangulohan ni Rael uban sa tulo niya ka kaubang batan-ong lalake. Ang laing grupo, gipangulohan usab ni Samuel, nga may tulo usab ka kaubang batan-ong lalake.
“Huh! Tayming gyud nga nag-abot ta ning buntaga dinhi sa dalan Magallanes nga atol sa Pista Senyor...! nanighawak si Rael nga maisugong mitudlo kang Samuel nga nanukad usab uban sa tulo niya ka kauban. “Nindot ni, aron maila kun kinsay hawod sa atong grupo sa natad sa manumano, sa dili pa ta mopadulong sa suki tang langob sa unahan aron mohithit og shabu...!” nanakmol si Samuel nga misenyas dayon sa tulo niya ka kauban.
“Bahala na’g Pista Senyor ug Sinulog ron. Matira ang matibay, karambola ta mga abay...!” singgit ni Rael nga midasmag dayon sa grupo ni Samuel uban sa tulo niya ka kauban.
Nagsugod dayon ang nga karambola sa duha ka grupo sa fraternity nga gipangulohan nilang Rael ug Samuel. Mipadaplin ang dasok nga mga tawo nga nagbahasbahas paglakaw sa dalan.
“Pagtawag mo’g mga pulis! May nagkarambolang nagsukmagay!” misinggit ang mga tawo sa dalan.
Nanglupad ang mga kinumo ug tiil. May nahasarasay nga naigo sa kumo. May milagubo nga naigo sa patid. Si Rael ug Samuel nagbawosbawos og kaigo sa ilang mga kinumo. Unya, kalit lang mipaka ang salba sa rebulber sa miabot nga nag-unipormeng mga pulis.
“Posasi ug dakpa ang mga badlungon nga nagkarambola....!” mando sa dakodako sa mga pulis. Apan abtik nga mipatiwala sila si Rael ug Samuel ug miatubang sa mga pulis. “Sir! Praktis lang ning among karambola! Duna mi shooting ron sa teleserye sa telebisyon....!” pangatarungan ni Rael.
“Bitaw, Sir! Praktis lang ning amo nga karambola atol sa Pista Senyor ug Sinulog...!” dason usab ni Samuel ngadto sa mga pulis.
Nakapangalot sa ulo ang mga pulis nga miresponde ug nanglakaw biya sa dalan Magallanes. Naglamanohay sila si Rael ug Samuel, lakip na ang tanan nilang mga sakop.
“Pit Senyor, Bay Samuel...!”
“Viva Senyor, Bay Rael...!”
Ug nagkasabot ang duha ka grupo sa fraternity nga mag-uliay na sila sa maayong kabubut-on. Maghiusa na sila, dili lamang atol sa Pista Senyor, kon dili, hangtud na sa kahangturan. (Kataposan)