Si Sr. Santo Niño
Gitrapohan ni Rowena ang rebolto ni Sr. Santo Niño nga iyang deboto. Unya nalipay siya kay nahuman naman ang iyang buluhaton.
Apan sa kalit lang naniga ang mga mata ni Rowena tungod kay niabot ang iyang bana nga si Belindo nga hubog kaayo ug gilabay ang rebolto ni Sr. Santo Niño sa salog. Wala matagbaw gipatiran niya ang iyang asawa.
Untop alas 12:00 sa tungang gabii may nabatyagan si Belindo nga nisakit ang iyang tiil hangtud nga nagtakiang ang iyang linaktan. Wa paabuta namurot sab ang iyang kalawasan. Tungod sa nahitabo ni Belindo nisangpit siya sa iyang asawa.
“Rowena, unsa man kini ang nahitabo nako...?”
“Belindo, gigabaan ka sa rebolto nga imong gilabay...”
Unya nagbasol si Belindo sa iyang gibuhat ug nakaamgo na siya nga makagaba gyud diay ang rebolto ni Sr. Santo Niño.
Apan sa kalit lang didto sa salog nga gilabayan niya sa rebolto, may nakita si Belindo nga anino nga walay tawo. Nilabay ang pipila ka gutlo ning siga ang iyang mga mata tungod kay ang anino nahimong usa ka bata. Ug nilakaw lang sab dayon.
Pasado alas 3:00 sa hapon nanimba sila sa siyudad sa Sugbo. Unya nangluhod sila nga nag-ampo sa likud nga bahin. Nitulo ang mga luha ni Belindo. Nangayo siya’g pasaylo sa iyang gibuhat. Wa maglangay namauli sila sa ilang panimalay.
Sa didto na sa ilang panimalay mingaw ang palibot. Apan sa kalit lang napasiga ang ilang mga mata tungod kay ang rebolto ni Sr. Santo Niño maayo na ang pagkabutang niini. Ug wala damha naayo na ang gihambin nga balatian ni Belindo. Nakahilak sa kalipay si Rowena kay naayo na ang iyang bana.
“Rowena, dili gyud diay angay magpasipala sa rebolto ni Sr. Santo Niño. Husto ... kadto diay’ng tag-iya sa anino nga nahimong balaang bata ... siya diay si Sr. Santo Niño!” (Katapusan)
- Latest
