Salamat sa pabuto

Gula 11

Naglami ang pagparayganay nila ni Ruben ug Zeny. Bisan og may anak na si Zeny apan ang iyang lawas ingon pa gihapon sa usa ka dalaga. Bigot pa kaayo ang lawas ni Zeny ug ang kalumoy sa mga ngabil ni Zeny nakapahaling pag-ayo og talagsaong kainit sa kalawasan ni Ruben.

Ingon sa nakabatyag si Ruben nga mipaspas ang iyang pagginhawa ug wala niya tuyoa nga lihokan na kaayo ang iyang mga kamot nga mihapyud-hapyod sa kalawasan sa dalaga. Ingon usab diay niini ang gibati ni Zeny tungod kay inanay na siya nga nadutlan sa kalalim sa ilang pagparayganay.

Miparayeg pag-ayo si Zeny kang Ruben. Misandig siya kang Ruben nga pinatakilid samtang ang tuo nga bukton gibalikis niya sa luyo’ng bahin sa boyfriend niya nga seaman.

Ingon sa mikalit kamabulokon ang kinabuhi ni Zeny. Nakasaad na g’yud unta siya nga dili na mahigugma pag-usab tungod sa kapakyasan niya sa gugma uban sa kanhi niya BF.

“Lauman nako Ruben nga magbinuotan ka ug dili ka sama sa kanhi nako boyfriend. Apan nagpabilin gihapon ako nga mabalak-on nga basin kun tua ka na sa barko ug layo ka kanako, imo na lang ako nga kalimtan,” ni Zeny.

Puno sa kabalaka ang tono sa sinultihan ni Zeny. Subli siya nga gihagkan ni Ruben ug nagparayganay na usab sila’ng duha. “Dili mahitabo nga magbudhi ako sa akong panaad kanimo Zeny. Gusto ko nga sa sunod nako nga pagkanaog sa barko, magpakasal na kita.”

Daw lanog kaayo ang mao nga mga pulong nga nadungog ni Zeny nga naghatag kaniya og dili matukib nga kalipay. Gigakus niya pag-ayo si Ruben ug siya na mismo ang mihawok sa iyang boyfriend.

Halos dili na makapugong si Ruben sa iyang gibati. (Sumpayan)