Happy New Year Langga
Gikipatkipat ni Eddie ang iyang mga mata samtang nanambo sa bentana. Maoy nasugat sa iyang panan-aw ug nadungog ang repeke sa nagkalidades nga pabuto sa ilang mga silingan. Miliso siya ug diha sa iyang tupad si Bebe, ang iyang asawa.
“Bebe! Bag-ong Tuig na diay...?” sukot niya sa asawa.
“Happy New Year, Langga...!” ni Bebe nga migakos kang Eddie.
Karon, nabati na usab ni Eddie ang tinawganay nilang duha ni Bebe. Langga ang tawag nilang duha sa ilang panagtiayon.
“Salamat, langga Ed, nga nahibalik na gayud ang normal mong pangisip! Tulo ka bulan kang nawad-an sa maayong pangisip!”
“M-mao ba? Ang atong negosyo? Kinsay miatiman, Langga?” ni Eddie nga mihapuhap sa bukobuko sa asawa.
“Ang bugtong tang anak ulitawo, si Rex, nga usa na ka CPA nga nakapasar sa miaging bulan pa lang, maoy nagdumala sa atong five-six nga negosyo sa tibuok merkado publiko sa siyudad! Nag-leave ko’g three months without pay sa akong pagmaestra sa publikong elementarya nga eskuylahan, aron lang pag-atiman kanimo. Wala ko ikaw iparehab, langga Ed...!” nagpahiyom si Bebe.
“Sus, kun wa ka mag-edad og 45, nagumon na hinuon ka’s paghithit og shabu nga nakapraning nimo...!”
Nakapanglingo si Eddie. Nabuang siya sa bisyo sa pagkahimabaye, sugal, pakigbarkada, inom og bino ug paghithit og shabu. Nalahap niya ang ilang kapital sa negosyo. Miniwang siya, napraning ug magyawyaw na’s kaugalingon. Hingpit siyang nawala sa kaugalingon.
“Gidungog ang among pag-ampo ni Rex, langga Ed! Ug atol gyud karon sa pag-abot sa Bag-ong Tuig nga naulian ka’s maayong pangisip, Ed!”
“Isaad ko, langga Bebs, nga magbag-o na ko. Hingpit ko nang biyaan ang akong bisyo ilabi na ang paghithit og shabu...!”
“Moabot na to ron si Rex uban sa iyang uyab nga nars! Andam na ang atong Media Noche, usa ka bultong litsong baboy, spagheti ug kalderitas nga kanding...!” Subling nagginaksanay sila si Eddie ug Bebe, samtang padayong mirepeke ang nagkalainlaing pabuto sa pagsugat sa Bag-ong Tuig.
“Happy New Year, Langga...!” nagkadungan og hunghong sila si Eddie ug Bebe nga padayong nagginaksanay niadtong orasa. (Kataposan)
- Latest
