Gipaantos lang

Dear Tita Salie,

Good morning. Usa ko sa liboan nga nagsunod sa imong column. Dili gyud kumpleto ang akong adlaw kun dili ko makabasa sa imong column.

By the way, just call me Pamela, 20 years of age, dalaga pa ko, Tita Salie, nga karon nag-antos na sa problema sa gugma.

Kanunay lang mi nga mag-away sa akong boyfriend. Wala’y adlaw nga dili ko niya pahilakon. Mora ba og iyang gipakita nga wala siya’y gugma nako ug nga wala na siya ganahi nako kay kanunay man lang init ang iyang dugo nako.

Mao nga makigbulag na unta ko niya, Tita, apan ang problema kay dili man siya mosugot nga magbulag mi. Unsa may akong sala nga iya man ko nga gipaantos niining among relasyon. Wala na siya’y gana nako apan dili pud mosugot kun akong bulagan.

Unsa may angay nakong buhaton? Palihug pasabta ko. Thank you very much and more power to your page.

* * *

Hello Pam,

Kun nagpakita na ang imong boyfriend og dili maayong taras karon nga manag-uyab pa mo unsa pa kaha kun minyo na mong duha.

Gihimo kining panag-uyab aron ang duha ka nagkahigugmaay magkailhanay sa usa’g-usa samtang dili pa sila makahukom nga magminyo. Busa kun karon nasayod na ka nga dili mo magkasinabot duna pa kay kagawasan nga mogawas sa inyong relasyon ug dili siya makapugong nimo tungod kay uyab pa lang kamo nga dili pa nimo siya bana.

Busa ayaw papugong kaniya kundili na gyud ka. Wala siya’y mahimo kun muingon kang wala na kamong duha.   -- Tita Salie