Selpun sa Pasko

Nagsingabot na gayud ang Pasko. Ang magtiayong Romy ug Josie, padayong nagdusoduso sa ilang badibading karomata daplin sa dalan ning buntaga, pamasin nga makakita pa og mahalin pang mga basura sa kadalanan.

Sila ang magtiayon nga nagpuyo sa eskuwater nga nagpakabuhi sa pagpamasura. Sa unahan, nasiklapan nila ang silingan nilang magtiayon nga sama nila, mga basurero sab. Sila mao si Felix ug Rica nga nagbitbit og mga baseyong sako.

“Pag-inabtik sab, Rom!” ni Josie ngadto kang Romy. “Si Felix kugihan kaayong makatimaho sa pagtambong kun dunay magpahigayon og christmas party, nga matud pa ni Rica, kanunay gyud makadala og selpun sa Pasko...!”

“Kakuyaw ba anang buhata, Josie, uy! Motambong og christmas party og makadala’g selpun! Ayaw tawon ko’g papangawata, uy!” balibad ni Romy sa asawa.

“Mag-inabtik ka, sama ni Felix, aron duna sab tay selpun sa Pasko...!”

Nakuryoso gayud si Romy sa kalaki ni Felix. Nianang pagkagabii, sadya na sab kaayo ang silingang magtiayong basurero nga gikang nakatambong og piging sa Pasko. Mihilom sa pagpaniid si Romy sa balay nilang Felix ug Rica ug namati sa panagsulti sa duha.

“Selpun na sab, Rica!” tingog ni Felix nga malipayon.

“Bilib gyud ko nimo, Lix! Abtik gyud ka! Basta naay pista ug mga piging sa Pasko nga imong matambungan, kadala gyud ka’g selpun!”

Milili si Romy sa gingi sa amakan nga bungbong sa balay nila ni Felix ug Rica. Ug ibabaw sa ilang lamesang kan-anan, maoy nasugat sa panan-aw ni Romy ang daghang selopin nga puno sa mga lamiang pagkaon nga gi-bring house sa magtiayong silingan nga basurero ug basurera.

Nakapangalot sa ulo si Romy nga nakatuaw.

“Abi ko’g unsa nga selpun! Selopin pun-on man diay sa bring house nga pagkaon....!” (Katapusan)