Mainitong Pasko

Niining unang adlaw sa pagtungtong sa bulan nga Disyembre, nagkapuliki na si Susan pagpanaod og mga christmas lights para sa iyang balay, timaan sa paghandom sa nagsingabot nga Pasko.

Gusto ni Susan nga sugaton sa mainitong paghangop ang pagkatawo sa batang Jesus, labina kay gisaaran siya sa iyang bana nga mouli karong Paskoha nga tua nagtrabaho sa gawas sa nasud.

Human gipangtaod ni Susan ang mga dekorasyon, giilisan usab niya ang mga bintana ug bag-ong mga kurtina, gipuno usab niya sa mga series lights ang christmas tree nga ginama niya sa sanga sa kahoy’ng bakhaw.

Buotan ug kugihan nga pagka-asawa si Susan, maayo usab kini mokupot og kwarta nga kinitaan sa iyang bana, “excited” na kaayo siya, labina kay kini usab ang unang adlaw sa pag-uli ni Marcos nga iyang bana sulod sa tulo ka tuig niining kontrata didto sa nasud sa Libya.

Ninglabay ang mga adlaw ug niabot na ang gikahinaman sa tanan ang adlaw sa Pasko, ug doble ang gibating kalipay ni Susan uban sa tulo niya ka  anak, nga sila si Amie, Dayrle ug Toto tungod kay niabot naman si Marcos nga iyang bana, unya pagkagabii niana mao na usab ang pagsaulog sa pagkatawo sa Ginoo.

Untop alas onse sa gabii nanimba silang tibuok pamilya sa usa ka misa, nga gihalad sa kura paroko sa ilang lungsod, agi’g pagyukbo sa pagkatawo sa batang Jesus. Gisugat nila sa tumang kalipay ang pagkatawo sa manunubos.

Human sa misa nagsugod dayon ang mga boto boto, dunay kwetis, rebentador, whistle bomb, ug uban pang mga nindot kaayo nga mga paboto, nagkagubot na usab ang mga tawo sa pagsaulog sa  Pasko, tukar didto, tugtog dinhi nga puno sa tumang kalipay ang ilang nadungog, gihukad usab dayon ni Susan ang mga lamiang pagkaon nga iyang giandam para sa iyang bana ug mga anak, paglabay sa pipila ka oras wala na ang mga boto boto, mingaw na ang palibot ug nangatulog na usab ang ilang mga anak, unya giduol ni Susan iyang bana.

“Salamat Marcos, nga gituman nimo ang imong saad,” matud ni Susan nga migakos og hugot ngadto sa iyang bana tungod sa tumang kamingaw.

“Dili ikaw mahimong pakyason Susan, tungod kay mahal ko usab kaayo ikaw,” tubag ni Marcos ngadto sa iyang asawa nga mipaak dayon sa mga ngabil niini.

Gibati ni Susan ug Marcos ang kainit sa ilang mga lawas, wala madugay nisulod sila sa kwarto ug ila usab nga gisaulog ang kainit sa duha nila ka  gugma. (Katapusan)