Silent night

Sa patag, mipaka-paka ang nagkalidades nga pabuto aron sa pagsugat sa Pasko. Hapit na gayud ang tungang gabii. Muabot na ang kasumaran sa pagkatawo sa atong Manunubos. Pasko na gayud!

Apan lahi si Noy Kadong. Ania karon siya sa mahabog nga bukid sa kalasangan sa Kanturapak, sa habagatang probinsya sa Sugbo. Sa edad nga 70, yagpis na ang iyang lawas ug nahimo siyang ermitanyo ning bukira sa daghan nang katuigan. Mga ihalas nga bungahoy mao na lamang ang gisustiner nga pagkaon, ang iyang noche buena sa matag Pasko.

Tag-as na kaayo ang puti niyang buhok ug bungot. Dili na maisip ang daghang Pasko nga iyang gisaulog ning bukira nga way nakaila kaniya. Taga Mindanao siya. Usa siya ka inilang propesor kanhi sa usa ka sikat nga unibersidad sa Mindanao.

Daghan na siyang mga libro nga nahimo. Nahimo siyang kritiko ni bisan kinsang politiko nga kaalyado sa gobiyerno ug sa dili kaalyado sa kagamhanan. Pakyas siya sa iyang kawsa sa pagsumpo sa inhustisya ug kurapsyon ug inhustisya sa atong nasud, pinaagi sa iyang mga sinulat sa iyang libro.

Daw nahimo siyang si Dr. Jose Rizal sa iyang kapanahonan. Nagpabilin siyang gulang ulitawo. Hilom siyang mibiya sa ilang dapit nga daw bula nga nahanaw. Daghang nagtuo nga gi-salvaged na siya sa mga tawong naligsan sa iyang mga sinulat sa  libro. Milalin siya dinhi sa Sugbo ug nakasaad nga igahin na lamang  ang nahabiling mga gutlo sa iyang kinabuhi nga mag-ermitanyo, samtang maghulat sa iyang kamatayon.

Karon, Pasko na sab. Dili na buot mosaksi pa si Noy Kadong sa mga kabus nga kanunay’ng mag-antos sa tumang kawad-on nga magsaulog sa Pasko. Dili na niya maantos pa nga kanunay’ng mosaksi sa mga adunahan nga motamihid sa mga kabus matag saulog sa Pasko.

“Palabihon ko na lamang nga mag-inusara ning siot nga lasang sa dakong bukid nga magsaulog sa daginutong Pasko sa akong kinabuhi.

Palabihon ko na lamang ang pagsanasana sa Paskohanong awit nga Silent Night, aron ikapahungaw ko ang way katapusan kong pagmahay sa dagan sa mga panghitabo diha sa katilingban nga akong gipuy-an, gikan pa sa sinugdan!” hunghong ni Noy Kadong sa iyang kaugalingon.

“Ginoo ko, kun mahimo, kuhaa na lang kining hinulaman kong kinabuhi, kay makadugang lang og kasakit sa akong dughan, ang pagsaulog sa inihap na lang nga Pasko sa akong kinabuhi nga nia  kanako ang agay-ay sa katigulangon, nga maghunahuna sa mga kabus kong kaigsuonan nga linupigan...!”

Ug unya, nanuhotsuhot na usab sa galamhan ni Noy Kadong ang paskohanong awit nga “Silent Night” nga gibulhot sa sound system didto sa patag, nga daw naghulagway sa iyang pagka-siya karon! (Kataposan)