Dear Tita Salie,
Maayong adlaw. Tawga lang ko og Mr. N, 22 yrs of age, usa ka ulitawo. Nahasol ko sa akong lovelife.
Duna koy hinigugma karon ug siya gyud ang natingban sa tim-os kong pagbati. Love gyod kaayo nako siya, Tita Salie, labaw pa sa akong kaugalingon.
Ang ako lang problema ug kanunay gyud kining mohasol kanako mao nga wala ko magdahom nga dili ako ang nakauna kaniya. Dili nako madawat ang iyang past ug dili nako madawat ang nahitabo kaniya. Kanunay nga gihasol niini ang akong hunahuna.
Pero unsaon man ni nako nga love man kaayo nako siya? Palihog pasabta ko, Tita Salie, kay naglibog na ko. Thanks and God bless you.
* * *
Hello!
Kun magmahal ta og tawo dili mahimo nga part lang niya ang atong dawaton. Dili mahimo nga ang iya lang nindot ang atong mahalon. Kun magmahal ka og tawo kinahanglan nimong dawaton ang iyang pagka siya, lakip na niini ang iyang kagahapon, karon ug ang umaabot. Tanan nga anaa kaniya ug si kinsa man siya.
Kun dili nimo madawat ang iyang kagahapon nagpasabot kini nga wala gyud ka mahigugma kaniya sa tinuoray. Kay dili ka man makadawat sa iyang mga kasinatian.
Mas maayo pa seguro nga inyo na lang hunongon ang inyong relasyon tungod kay kanunay gyud ka niining mahasol kay imo man kining hunahunaon labi na kun kamo maayo ang pagtinagdanay. Mao ra usab unya kini ang kanunay nga hinungdan sa inyong away.
Busa kun love gyud nimo siya ayaw na utingkaya ang iyang kagahapon kay wala ka pay labot niini, since wala pa ka sa iyang kinabuhi dihang nahitabo kini. -- Tita Salie