“Tiguwang pulihi na’g batan-on ang tiguwang. Iduot ang lubot sa tiguwang aron mobulhot.”
Mao nay perming isinggit ni Mangloy kang bay Tino sa dihang malabyan na niya sa iyang trisikad. Grabe ka bugalbugalon si Mangloy apan wa kana igsapayan ni Bay Tino. Mokatawa lang siya, dili kamaong masuko.
Kini si Bay Tino bag-o lang ning na miyembro sa among kapunungan sa trisikad nga nagbiyahian sa Gabi ug Alegria. Estranyo siya og wa gyuy hingpit nga nakaila kaniya. Apan mahigalalon siya. Gani nagkasuod dayon mi ni Bay Tino. Usa ka hapon niana gi-agni nako si Bay Tino nga mag-inom.
“Bay karong gabii mag-inom ta’g tuba para katug lang gud. Diha sa tindahan nilang Wilson Roset maayo kay pure ilang tuba.” “O sige bay mag-inom ta! Sanong ni bay Tino.” Si Mangloy nga nakadungog sa among sabot misugyot dayon. “Kuyog ko ninyo noy mag-inom ta.” “Okey kaayo Mangloy aron alegre atong grupo,” sanong ni Bay Tino.
Sa dihang mikilumkilom na nagdungan dayon kaming tulo sa pag-adto sa tindahan ni Wilson Roset. Human maka-order og usa ka galon tuba gisugdan dayon ni Mangloy og tagay ang tuba. Sa dihang nakatuyok na ang baso gibuak dayon ni Mangloy ang kahilom.
“Noy Tino ayaw ug kalain ha? Taga diin man ka ug kinsa man gyud ka?”
“Aw o diay no wa man diay ko kapaila ninyo ako diay taga Masbate. Milangyaw ko sa Cebu aron magbag-o sa akong kinabuhi.” Unsa man diay ang imong kaagi Noy gubot ba diay kaayo? Pakisusi ni Mangloy. “O kaayo Mangloy, abi nimo Mangloy pilyo kaayo ko sa dihang batan-on pako. Pirme ko kakita og engkwentro sinukmagay didto, binunalay diri. Mao nga daghan ang nagdumot nako.”
“Usa ka gabii niana samtang nang-disco ko sa among dapit nadunggaban ko. O tan-awa ang uwat sa akong tiyan. Wa ko mokiha kay gusto kong manimalos. Naka balus gyud ko napatay nako ang akong kontra. Ug tungod lagi kay kwartahan man ang ginikanan sa akong gipatay nasintensiyahan ko og bayente ka tuig. Nagbasol ko sa akong nabuhat pait ang mabilanggo ta, mingaw, gutom ug way kaseguruhan ang atong kinabuhi sulod sa bilanggoan. Mao nga sa dihang nakalaya nako nakahukom ko nga mopuyo dinhi sa Cebu.”
“Kuyawa diay sa imong kaagi Noy no exconvict diay ka?
“Tinuod na Mangloy exconvict ko apan gibasolan ko ang tanan. Mao nga dili na maayo nga magpinilyo ta Mangloy, kay wala gyoy pagbasol nga mag-una sa ulahi gyud na.”
Igo gyud nakahuman og saysay ni Bay Tino sa iyang kaagi nahurot usab ang usa ka galon nga tuba. Mao nga nag-iyahay mig pauli sa among tagsa-tagsa ka panimalay.
Sukad niadto wa nay Mangloy nga nagbugalbugal pa ni Bay Tino. (Katapusan)