Gusto’ng paundangon

Dear Tita Salie,

Tawga lang ko og Jean, 35 yrs old, minyo unta apan 15 yrs na nga buwag sa bana. Duna koy 3 ka  anak ug ania sila nako.

Nagtrabaho man gud sa Manila ang akong bana apan wala na siya mopauli kay duna na man siya’y katipon nga laing babaye.

Nagtrabaho ko karon, Tita, isip cashier sa usa ka Dep’t Store. Duna ko’y uyab karon nga minyo usab kaniadto apan buwag na usab sa iyang asawa ug duna sila’y usa ka buok anak.

Kining akong uyab seloso kaayo. Gusto siyang makigtipon nako kay lagi mahal man namo ang usa’g-usa. Apan mao man say gusto niya nga moundang ko sa akong trabaho kay lagi seloso man siya kaayo.

Makigtipon kaha ko niya? Ug moundang ko sa akong trabaho? Palihug pasabta ko, Tita Salie. Thank you very much.

* * *

Good day Jean,

Aduna gyu’y tawo nga dali kaayong maghimo og plano alang sa laing tawo bisan wala nila makit-i ang mga sangpotanan sa ilang hukom.

Ang uban mouyon lang usab dayon sa gusto sa uban tungod ug alang sa ilang dakong kahadlok ug gugma.

Kinahanglan, Jean, nga imong tan-awon  una kun unsa may mahitabo unya sa inyong kinabuhi kun ugaling imong undangon ang imong trabaho? Kaya ba niyang buhion ug pa-eskuylahon ang imong mga anak?

Unya imo usab nga tan-awon ang iyang kahimtang. Ayaw kalimti nga minyo siya, bisan bulag man sila sa iyang asawa apan dako siyang minyo, ug dunay anak so, dako gyud kaayo ang posibilidad nga mawagtang siya kanimo kay dili man siya imoha. Unsa na man unya ang imong panginabuhian kun ugaling wala na siya kun mouyon ka nga moundang sa imong trabaho? -- Tita Salie