Jezebel - Gula 115

Miduol dayon ko sa nahimutangan ni manang Ester aron tabangan siya.

“Ako na lang dinhi, Day Jezebel,” giingnan ko ni manang Ester. “Ihatod hinuon kanang kape ni mam Elvira ug pagkahuman, bisbisig tubig ang mga buwak sa tugkaran.”

“Oo, Manang,” nako pa dayong sapwang sa plato nga gipatongan sa tasa sa kape nga alang sa among agalon.

Mibiya dayon ko sa kusina aron paghatod sa kape ni Mrs. Elvira Lim. Naabtan ko siya nga nagbasabasa og pamantalaan sa may sala. Miduol ko sa iyang nahimutangan.

“Nia na ang imong kape, Mam,” nako pa dihang nahiduol na kaniya.

“Salamat,” matud ni Mrs. Lim. “Ibutang lang kana diha sa ibabaw sa lamesita, Day.”

“Gituman nako ang gisulti ni Mrs. Lim.

“Wa ka nay laing isugo, Mam?” Gisukit ko siya.

“Wa na,” niya pa. “Balik na sa imong buluhaton, Jezebel.”

Dihadiha mibiya ko sa nahimutangan ni Mrs. Elvira Lim. Milahos ko sa gawas sa balay. Akong gidumdom ang outlet sa tubig sa may tugkaran. Gitaoran ko kini og hose ug misugod dayon sa pagpamisbis sa mga tanom sa may tugkaran sa balay.

“Good morning...”

Milingi ko pagkadungog sa tingog nga naggikan sa akong luyo. -- Sumpayan pa