Usa ka magtutudlo si Carlos. Psychology ang subject nga gitudlo niya sa iyang mga estudyante sa kolehiyo. May pagkahambugero si Carlos. Ug estrikto sab.
“Kinahanglang mopalit gyud mo og libro nga prescribed sa eskuylahan ining subject nga akong gitudlo. Unya, kun duna moy pangutana, kinahanglan wala sa libro ang tubag. Kay kun naa sa libro, itudlo ko lang unya ninyo asang pahina mabasa ang tubag,” ni Carlos sa unang adlaw sa klase. Gihatagan dayon niya’g assignment ang mga estudyante. Gipabasa nila ang Chapter I sa Book of Psychology.
Sa sunod adlaw sa klase, niisa sa ilang tuong kamot ang tulo ka estudyante nga sila si Nelson, Bobby ug Moises. Barkada ni silang tulo. Unya notoriyos nga di mahadlok og terror nga maestro.
Gitudlo ni Carlos si Nelson. Nitindog si Nelson ug nangutana.
“Nakahinabi ka ba’g tawong kimpang mahitungod sa iyang linaktan?” ni Nelson. Gitudlo niya si Bobby.
“Nakahinabi ka ba’g tawong bungi mahitungod sa iyang sinultihan?” ni Bobby. Gitudlo niya si Moises.
“Nakahinabi ka ba’g tawong libat mahitungod sa iyang tinan-awan?” ni Moises.
Niagik-ik ang ubang mga estudyante. Nakapanglab-ok og laway si Carlos.
“Tinuod nga wa sa libro ang tubag sa inyong mga pangutana. Apan mag-research pa ko ana,” ni Carlos.
“You don’t have to do research work about our questions. They can be answered by a simple “yes” or “no!” ni Moises. Nanglipaghong si Carlos. Nahilom. Unya gibuhian og sayo ang mga estudyante. Nahanaw ang kahambugero ug kaestrikto ni Carlos.
Sa gawas sa lawak saringan, niapir nilang Nelson, Bobby ug Moises, ang ilang mga kaklase. (Kataposan)