Rape victim - Gula 7

Naglibog g’yud si Lanie kun unsay iyang himuon. Nakahuna-huna si Lanie nga iyang sugton si Richard apan kalit lang usab nga musantop sa iyang huna-huna ang nahitabo kaniya nga biktima siya sa pagpanglugos sa usa ka rapist nga iya gani nga napatay.

Musamot ang kahasol sa iyang huna-huna tungod kay nasayod na siya nga si Richard nga usa ka police detective maoy gitahasan sa ilang hepe sa paghimo og follow-up sa mao nga krimen aron mailhan kun kinsa ang mipatay sa tawo nga gipunggotan sa iyang liog.

Milabay ang mga adlaw ug miabot na ang higayon nga mobalik na si Lanie sa siyudad. Wala siya makapananghid ni Richard. Paglabay sa usa ka semana, mibisita kang Lanie ang iyang inahan ug misugilon kini nga ang putol nga ulo sa gipatay didto sa daplin sa sapa nakit-an na.

Nagpatuo si Lanie nga wala’y kasayuran ug miusisa kunohay kun diin makit-i ang ulo. “Didto ra makit-i ang ulo nga gilabay sa pangpang nga agianan paingon sa atong balay Lanie,” matud sa iyang inahan. “Didto sa balay si Richard kagahapon ug nangita kanimo,” dugang sa mama.

Pagbiya sa inahan ni Lanie sa iyang gitrabahoan nga panimalay, gihakop og grabe’ng kalibog sa huna-huna si Lanie. Nabalaka siya nga basin og mahibaw-an sa kapolisan nga siya ang nakapatay sa lalaki ug mabilanggo unya siya.

Pagkaugma, nahingangha si Lanie kay kalit lang mibutho pagbalik ang iyang inahan ug kauban niini si Richard. Ingon sa nangluspad si Lanie nga nakakita sa higala niya nga police detective.

“Unya mouna na lang ko nimo dong Richard,” matud sa inahan ni Lanie nga wala pa masayod nga ang iyang giubanan usa diay ka polis. (Sumpayan)