Gula 2
Wala g’yuy nahimo si Lanie sa pagpanalipod sa iyang kaugalingon gikan sa tawo nga miamong-among kaniya. Gipasimhot si Lanie og kemikal nga isog kaayo’g baho nga inanay’ng nakapalipong kaniya. Diha’ng nabalikan sa panimuot si Lanie, wala na siya’y sapot ug naghigda sa binukhad nga sako sa bugas didto sa kalibonan daplin sa sapa.
Ngiob kaayo ang palibot mao nga naglisod pag-ila si Lanie kun kinsa ang miamong-among kaniya ilabi na nga gibiawan sa luha ang iyang mga mata sa pagsige’g hilak tungod sa nahitabo kaniya. “Pag-ilis na aron makapauli ka na,” giingnan si Lanie sa tawo nga naglugos kaniya. Padayong nagbakho si Lanie.
Bisan giunsa pagtutok ni Lanie sa panagway sa maong tawo aron unta iya kini’ng mailhan wala gayud siya makahimungawong. Dili kaayo niya sinati ang mga tawo sa ilang barangay sa Antuwanga kay dugay na siya nga nanarbaho sa siyudad ug panagsa na lang siya nga mopauli sa ilang dapit sa bukid.
Nakabantay si Lanie nga misul-ob na ang lalaki sa iyang karsones. Nakabantay si Lanie nga naglisod ang lalaki pagsul-ob sa iyang karsones nga gamay ang dapit sa tiilan nga bahin. Midan-ag sa kilid sa binukhad nga sako sa bugas nga gipahigdaan sa lalaki kang Lanie ang sundang nga gitakin sa rapist kaganina.
May misantop sa huna-huna ni Lanie. Gikuha ni Lanie ang sundang ug giawhas kini gikan sa iyang sakoban. Mihangos si Lanie tungod sa naghingapin nga kalagot sa lalaki nga naglugos kaniya.
“Makabawos na g’yud ko nimo!” singgit ni Lanie dungan sa paghunat sa pagtigbas sa lalaki. Ang lalaki misuway sa paglikay apan natumba kini kay wala pa masul-ob ang iyang karsones. Sa unang paghapos ni Lanie, nababha ang bukton ug dapit sa liog sa maong lalaki.(Sumpayan)