Mga kalag nga nagpakita

Sunod semana molarga na si Esyong sa Mindanao. Kay aduna na pud siya’y trabaho nga nagpaabot kaniya nga usa ka welder. Sa wala pa molarga gipalitan niya ang duha ka  anak nga sila si Roda ug Godo ug mga nindot nga mga sinina.

Unya puwerte gyud lipaya sa duha niya ka anak kay pinangga kaayo sila uban sa ilang inahan nga si Lucrecia. Ug nihangyo si Lucrecia nga mouli sa iyang adlaw’ng natawhan. Pila may dagan sa mga adlaw nagtrabaho na si Esyong sa Mindanao. Unya nindot ang dagan sa iyang trabaho kay maayo og batasan ang iyang mga agalon nga sila si Matias ug Yolanda.

Ug dili lang sab hibaw-an mopauli na si Esyong sa ilaha. Mao nga giandam na niya ang mga dad-unon, kay molarga na siya inig kabuntag. Unya untop alas 2:00 ang takna sa hapon human gayud sa iyang panghipos sa dad-unon, kalit lang may nanuktok sa pultahan.

Ug sa pag-abli ni Esyong wala’y tawo nga nakita. Wa paabota ningsiga ang iyang mga mata kay nibutho ang duha niya ka   anak.

“Papa Esyong, pauli dayon sa atoa kay gimingaw na si mama nimo!” nagkadungan sa pagsulti ang duha niya ka anak. Unya nahibulong si Esyong kay nilakaw man lang sab dayon. Mao nga nagdali siya sa pagpauli nga dalang kakulba.

Sa didto na sa ilaha nakalitan si Esyong kay daghang tawo sa ilang panimalay. Nakuyawan siya tungod kay may nagtapad nga lungon sa iyang atubangan. Ug iyang gitan-aw ang sulod sa mga lungon. Nanglurat ang iyang mga mata, kay ang sulod sa tagsa ka lungon mao man ang duha niya ka pinalanggang mga anak. Unya giduol siya ni Lucrecia.

“Esyong, namatay sila tungod kay namalit sila sa lungsod og pagkaon nga para unta sa akong adlaw’ng natawhan. Ug naaksidente ang ilang gisakyan,” pasabot ni Lucrecia.

“Pero...ako to silang nakita kagahapon!”

“Nagpakita sila tungod sa imong kamapinanggaon. Sa nahitabo nimo kagahapon...mao na kadto ang ilang mga kalag nga nagpakita!” (Kataposan)