Naghuna-huna si Glenn kun unsaon niya pagtubag si Tessa pananglit mangutana kini kun unsa ang naggahi nga nagbag-id ug madaitol sa iyang sampot, ilabi na kun iduot-duot sila sa mga tawo.
Wala tuyoa ni Glenn nga sa tanto niya nga paghuna-huna og mga paagi, misamot na hinuon pagsanting sa kagahi ang bahin sa iyang lawas nga nabag-id sa sampot ni Tessa. Bisan og giunsa niya pagpugong nga dili kini mahitabo, apan napakyas siya.
Samtang padayong nagsandig kaniya si Tessa, gipiyong ni Glenn ang iyang mga mata ug wala niya gihuna-huna ang iyang sitwasyon sa pamasin nga molumoy ang naggahi nga bahin sa iyang lawas.
Gilabyog ni Glenn ang iyang huna-huna aron maglatagaw kini sa tumong nga dili niya mabatyag ang kalalim nga iyang gibati nga ang iyang sensitibo nga parte sa lawas nabag-id sa sampot ni Tessa.
Tuod milampos si Glenn kay anam-anam nga mikupos ang kaganiha puwerte’ng gahia nga bahin sa iyang lawas. “Hay salamat kay mituang na g’yud tawon ang uwan Glenn,” matud ni Tessa nga maoy nakapabalik sa iyang kaisipan.
Anam-anam na usab nga namiya ang mga tawo nga kaganina nagpunsisok sa temporaryo nga kapilya sa menteryo. Iya-iya kini nga namalik sa lubong sa ilang mga minahal sa kinabuhi.
“Abi nako og dugay pa g’yud nga motuang ang ulan Glenn,” matud ni Tessa. Nalantawan na nila ang bidlisiw sa kahayag gikan sa sidlakan nga bahin nga nagpasabot nga hapit na ang kabuntagon.
Miginhawa’g lawom si Glenn. “Naluoy kaayo ko nimo kay nasayod ko nga gikapoy ka g’yud sa pagsige og tindog,” giingnan ni Glenn ang dalaga. “Ako maoy naikog nimo kay bug-at kaayo ko nga misandig nimo,” dali nga tubag ni Tessa.
Namalik sila sa lubong sa inahan ni Tessa. Giagbayan ni Glenn ang dalaga ug wala kini motutol sa gihimo sa ulitawo. (Sumpayan)