Dili masabot usahay

Dear Tita Salie,

Good day. Tagoa lang ko sa ngalan nga Carin, minyo ug dunay mga anak. Ang akong pangayoan kanimo og tambag mahitungod sa akong bana nga usahay dili ko masabtan ang kinaiya.

Wala man hinuon ko magbasol nga siya ang akong bana tungod kay pinangga man kaayo mi niya. Apan ang akong reklamo kay dili man siya consistent sa iyang batasan ug tinagdan namo.

Sama pananglitan sa panahon nga mohangyo ko niya kay magpacheck-up, moingon ra man hinuon nga nagdrama lang kuno ko bisan kun tinuod gyud nga naglain ang akong lawas.

Unsa may akong buhaton? Palihog pasabta ko, Tita Salie. Thank you very much and more power.

* * *

Good day,

Ako lang i-share nimo ang akong nahibaw-an sa ubang mga tawo, isip reaction sa ingon nga situwasyon. Duna man gud ko’y nailhan nga susama sa imong bana. Dili dayon siya motuo kay ang tinuod nahadlok siya nga tinuod kang dunay sakit tungod sa gasto. Kay bisan kuno kun kini pa-check up lang apan dunay bayad ang check-up ug duna pa gyu’y resita nga ihatag ang doctor nga nagcheck-up. Busa maoy iyang gusto nga kun makaya pa ang sakit o ang gibati sa lawas agwantaha lang usa. Tumari og tambal o ipahulay lang usa. Usahay ang kawad-on maoy hinungdan kun nganong dili ka dayon tuohan.

Busa kun ugaling sa imong tan-aw lain gyud ang imong lawas ug dili sila motuo kanimo adto dayon sa doctor o sa clinic nga medyo barato lang kay dili pud maayo kun ang imong gibati mapasagdan kay makahimo na hinuon kini og bug-at nga problema. -- Tita Salie