I love you Tessa

Gula 2

Nasayran ni Glenn nga taga probinsya g’yud si Tessa. Naatol lang diay nga ang iyang inahan mibisita sa igsuon niini sa Barangay Kamputhaw ug diha maatli nga giatake kini sa sakit sa kasing-kasing ug namatay.

Gusto ni Tessa nga igahin niya ang iyang oras hangtod magbuntag sa pag-estar atubangan sa lubong sa iyang inahan kay panagsa ra g’yud siya nga makabisita niini kay layo ang probinsya gikan dinhi sa dakbayan.

“Biyai lang ko dinhi Glenn, daghan man’g tawo. Ayaw na lang kabalaka nako,” giingnan ni Tessa si Glenn. Apan wala g’yud mopauli si Glenn ug giubanan gayud si Tessa. Bisan unsa na lang ang ilang gipanagsultihan.

Mga alas tres sa kaadlawon, gibati sila og kagutom. Giagni ni Glenn si Tessa nga mag-snack sila ug mamalik lang pagkahuman. “May motor ka diay Glenn? Maayo hinuon kay makabalik ra ta dayon,” matud ni Tessa.

Didto sila nag-snack sa usa ka fast food restaurant atubangan sa Colegio dela Inmaculada Concepcion sa eskena Gorordo ug General Maxilom Avenue. Dali ra g’yud kaayo sila nga nagkasuod. Susama na gani og dugay na sila nga nagkaila.

Nasabtan ni Glenn nga buotan si Tessa. Probinsyana kaayo kini og batasan nga may pagka mahinhin ug manggiulawon.

Human nila’g pangaon, namalik sila sa menteryo. Wala gayud damha ni Glenn nga ikahibalag niya ang babaye nga ikadeyt ning adlaw sa mga kalag.

Samtang nagbarog sila atubangan sa lubong sa inahan ni Tessa, takulahaw lang mihabo-habo. Gihukas ni Glenn ang iyang jacket ug gipakupo kini kang Tessa aron dili mabasa sa habo-habo.

Apan mikusog ang habo-habo ug nahimo na nga taligsik. Nagdinaganay ang mga tawo nga mipaingon sa kabahin sa menteryo nga adunay gamay’ng atop aron sila makapasilong.

Naghuot ang mga tawo ug didto, wala tuyoa nga nagdikit ang ilang masig ka lawas. (Sumpayan)