Usa ka semana sa dili pa ang kalagkalag, niadto si Rodnel sa menteryo, aron sa pagpanglimpyo sa mga nitso sa nitaliwan niyang mga ginikanan.
Gusto ni Rodnel nga limpyo na ang tanan, aron pag-abot sa kasaulogan sa adlaw sa mga kalag, paghalad na lang sa mga pagkaon, ug pag-ugbok sa mga kandila ang iya na lang unya nga pagabuhaton.
Apan samtang gihiwatid ni Rodnel ang iyang hawak, ug gilingilingi ang iyang ulo tungod kay gibikugan kini sa pagsigi og bugwal sa yuta. Nakita niya sa unahan ang duha ka tigulang, lalaki ug babaye nga naglingkod sa duha ka nitso nga nalapawan sa mga sagbot. Nadapit ang pagtagad ni Rodnel sa mga tigulang, iya kining giduol ug gipangutana.
“Ingko, Inse! Maayong buntag, asa diay inyong mga anak, nganong kamo ang mianhi sa menteryo sa pagpanglimpyo sa mga nitso? matud ni Rodnel ngadto sa mga tigulang.
“Napulo’g duha ka tuig na nga wala mouli among anak, dong, iya na lang kami gikalimtan human siya naminyo og usa ka langyaw, gimingaw na kami kaniya gusto na namo makita ang among anak,” tubag sa mga tigulang ngadto kang Rodnel.
Gibati ni Rodnel ang kalooy ngadto sa duha ka tigulang, ug bulontaryo siya nga nitabang sa pagpangguna sa mga sagbot nga nitabon sa duha ka mga nitso.
Ninglabay ang pipila ka mga adlaw human sa pagpangandam, niabot na gyud ang kasaulogan o pista para sa mga kalag, giugbokan dayon ni Rodnel ug mga kandila ang gilubngan sa iyang mga ginikanan, unya gihalaran niya og mga buwak ug mga pagkaon, nga gipamatong ni Rodnel ibabaw sa tagsa-tagsa nila ka mga nitso.
Usa ka oras human sa iyang pagpanagkot, nakahukom na si Rodnel nga mouli sa iyang balay, apan usa ka babaye ang niduol ug nagpatabang kaniya.
“Kuya pwede magpatabang!” matud sa babaye ngadto kang Rodnel. “Tabang sa unsa ma’am?” tubag usab ni Rodnel sa babaye.
“Patabang ko nimo kuya, kun hain nahimutang ang gilubngan sa akong mga ginikanan, dugay na man gud ko nga wala ka bisita kanila,” matud sa babaye dayo’g tunol sa hulagway sa iyang mga ginikanan nga dugay nang nangamatay.
Kalit namarog ang balahibo ni Rodnel, dihang nakita niya ang maong hulagway, kay hulagway kini sa duha ka tigulang nga iyang nahimamat, ug gitabangan sa wala pa ang kalag-kalag.
Gitultulan dayon ni Rodnel ang maong babaye sa gilubngan sa duha ka tigulang, unya pagkahuman dali si Rodnel nga nigawas sa menteryo nga nagpanglingi. (Katapusan)