Sunod buwan na ang kasal nila ni Meldred ug Riel. Unya nagpaabot sab sila sa bugtong igsuon ni Meldred nga gikan sa laing nasud sa Canada kay mouli aron motambong sa kasal. Wa magdahom nga mangasawa si Riel kaniya kay taga-Mindanao man manimuyo ug nagbakasyon lang sa ilang lugar ni Meldred. Nindot kaayo ang dagan sa ilang panaghigugmaay kay pulos sila mga buotan. Dili hibaw-an sunod semana na ang ilang kasal.
Apan sa kalit lang may trahedya nga niabot sa ilang kinabuhi tungod kay giatake sa kasingkasing si Meldred og nabugtoan sa kinabuhi. Puwerting ngaab ni Riel sa paghilak, kay mawala na man sa dayon si Meldred.
Untop alas 2:00 sa hapon nilukat si Riel og ticket sa Metro Ferry kay moadto sa siyudad sa Sugbo aron mosimba. Unya niabot ang MV Princesa.
Apan sa wala damha ningsiga ang mga mata ni Riel sa lain niyang nakita nga nagsul-ob og lubos itom, tungod kay ang usa sa pasahero, mao si Meldred nga iyang hinigugma. Unya nagpadulong na kaniya.
“Riel, ayaw kalisang. Dili ako si Meldred nga imong nakita. Ako si Mila ang kaluha ni Meldred nga naalaan lang nimo. Gikan ako sa laing nasud sa Canada. Ug wala lang ka sultii sa akong igsuon nga kami managkaluha kay iyang isurpresa diha kanimo. Unya nananghid ka man sa akong mga ginikanan nga padulong ka sa siyudad, mao nga giapas ko ikaw uban kanila nga bag-o pa lang nilakaw,” pasabot ni Mila.
“Mila, sa pagkakita nako nimo gibati ko’g paghigugma. Pasayloa ko tungod kay managkaluha mong Meldred. Manghinaot nga sugton ko nimo,” ni Riel.
“Ugma lang tika tubagon!” ni Mila.
“Mila, sama ra gud anang mosuroy ka sa department store, unya naa kay gikaibgan nga nindot nga butang...siyempre mangandoy kang maimo. Mao kana ang akong pagtan-aw nimo,” ni Riel.
“Oo, gisugot na tika...dili ka lisod higugmaon..gawas nga ambungan, hinigugma sab sa akong igsuon. Karong sunod semana malahos na ang kasal, kay ako ang mohulip sa akong kaluha,” ni Mila.
“Mila, salamat sa pagsabot. Para nako ikaw ang hulog sa langit!” (Kataposan)