Gula 7
Nagtinutokay sila si Glenna ug Lester. Samtang hilom sila’ng duha apan anam-anam nga miaginod sa lamesa ang kamot ni Glenna ug taud-taud migunit na kini sa kamot ni Lester samtang walay pagkabugto ang ilang pagtinutokay. Miduko si Lester nga mora’g nauwaw. “Glenna, kun dili ka pa akong manager, dugay na tika nga gidaygan sa akong gugma,” giingnan ni Lester si Glenna sa maaghop kaayo nga tingog ug hinay nga pagkasulti.
“Buot mo ba’ng ipasabot Lester nga may pagbati ka usab nako?” ni Glenna pa nga kalit lang gilutawan og pahiyom nga nakapasamot sa kaanindot sa iyang mga lips. Mitutok pag-ayo si Lester kaniya.
“Uy, mangaon na ta! Kamo diha Glenn, dali na mo!,” misangpit na ang higala ni Glenna nga nag-birthday. Sa ilang pagpangaon, sweet kaayo sila si Glenna ug Lester. Mikuha si Glenna og mga sweet foods ug gidad-an niya si Lester.
Lapas na alas dies sa gabii sila nga mipauli. Pag-abot nila sa Estaca, Compostela gihunong ni Glenna ang kotse sa parking area sa usa ka beach resort. “Gusto ko nga tiwason nato pag-estorya ang naputol nato nga pagsultihanay ganina Lester. Dili na lang ko magliko-liko… nakagusto ko nimo, and I love you,” ni Glenna.
“Angkonon ‘sab nako Glenn, I love You,” abtik nga tubag ni Lester. Bisan og lisod ang ilang kahimtang sulod sa kotse, apan nagginaksanay sila nga tugob sa kamalipayon. Nasingo ni Lester nga humot kaayo si Glenna.
Nag-abot ang masi’g nila ka mga ngabil ug gidimdim nila ang katam-is sa pagmahalay. “Nasayod ka na sa akong panginahanglan Lester, tulo ka tuig na nga nagbuwag kami ug ang akong bana. Mo-check in ta og cottage ni’ng maong beach resort,” giingnan ni Glenna si Lester.
“Sige ikaw ang mag-igo Glenn,” ni Lester nga nakapanglantaw na og unsay nagpaabot sa unahan. (Kataposan)