Secret Admirer

Nahinangop si Carolyn kay sa iyang pagpamati sa pakigsulti sa abogado ngadto sa iyang kompanyero nga gitawgan nasabtan niya nga nakaila kini kun kinsa si Atty. Razon nga kanunay lang molibre kaniya sa paniudto apan wala niya hiilhi.

“Aw mao ba? Sa ato pa associate diay na siya ni Companero Ruphil?” matud sa hamtong  nga abogado. Pagkahuman og sultihanay sa abogado ug sa iyang gitawgan, nagpahiyom kini nga mitutok kang Carolyn.

“Dili lang ko maniguro ha, basta ang akong kompanyero mitug-an nga may associate nga abogado nga Atty. Razon nga anaa nagtrabaho sa opisina sa higala namo nga abogado. Wala na ko’y numero niya kay nag-ilis tingali. Apan ang ilang opisina anaa ra sa Gorones Building duol sa Santo Niño,” matud sa hamtong abogado.

Nagpasalamat si Carolyn nga may nakatug-an na g’yud kaniya kun asa mag-opisina si Atty. Razon. Sa ato pa, anaa ra sila sa usa ka building ug kanunay ra g’yud diay sila nga magkakita.

Pagkahuman ni Carolyn sa gihimo niya nga research, mibalik siya sa iyang gitrabahoan nga bupete.  Hapit na ang alas singko sa hapon mao nga wala na lang siya mag-opisina pa ug hinuon nangandam na lang nga mopauli.

Nananghid siya sa kauban niya sa opisina nga mouna na lang og pauli kay magbayad pa siya sa bayranan sa iyang cellphone bills. Pagkanaug ni Carolyn sa hagdan may gikasugat siya nga lalaki.

Kalit lang siya nga gikulbaan kay familiar kaayo kaniya ang dagway sa lalaki. Tuod, usa kini sa mga abogado nga naglingkod sa pikas lamesa didto sa IBP canteen kaganina.

 “Mouli ka na ba Lyn?” gitimbaya si Carolyn sa maong lalaki nga nakapasamot sa pagkulba sa iyang dughan. Igo lang siya nga miyango ug mibawos sa pagpahiyom. (Sumpayan)