Ang kapalaran

Lab-as ang hangin nga mipalid sa buhok ni Marta samtang nagsakay’g habalhabal nga giamboan sa bagang duot sa kalubihan. Hayahay kaayo iyang pamati karon.

Bag-o lang siyang nakasakmit og laing yuta sa kabos nga mag-uuma pinaagi sa iyang kabagsik ug kamaldita. Dato na si Marta. Apan di gihapon kontento sa nagtipun-og nga bahanding nahuptan. Gusto pa siya nga mapun-an pa kini’g laing daghan. Busa, padayon ang iyang pagpangilog og yuta sa mga kabos, kinsa walay arang ikasukol kaniya.

Isog si Marta. Impluwensiyado siya sa ilang dapit. Gikahadlokan siya sa mga tawo. Lakip, iyang bana, bahag ang ikog, nahimo niyang ander de saya. Di makapugong bisan unsay gusto niyang buhaton.

Hapit na sila moabot sa lungsod, dihang pagliko nila sa unang eskina, may usa ka tawong nagbonet nga mipara nila. Nahasiga ang mata sa habalhabal drayber dihang nasigpatan niya nga nagbitbit og .45 kalibre ang maong tawo.

Imbes  mohunong, mihana hinuon sa pagpakusog ang habalhabal drayber. Pero wa pa gani kini makabuylo, nanglupad na ang sagunsong bala sa kamatayon tumong kanila.

Mitualsik ang dugo sa duha ka ulo nga gilagbasan sa nagpangagot nga mga tingga. Nagdungan pagkahagba silang Marta ug habalhabal drayber sa yuta nga pulos wala nay kinabuhi. Samtang ang mamumuno, kalma rang misakay sa bak-ap niining kauban, kinsa misirit dayon sa pagpadagan ngadto sa wala hibaw-ing direksiyon.

Miabot ang mga pulis sa crime scene. Nakapanglingolingo sila pagkakita sa nangamatay. Nakaila sila sa habalhabal drayber: drug pusher kini ug nagtumpitumpi ang kaso. Ug labaw pa silang nakapanglingolingo pagkamatikod nila kinsa ang babaye nga namatay?

“Pastilan, Pare, di gyod mahibaw-an ang tawo, no? Bisa’g unsa pa nimo kadato, bisan unsa pa nimo kagamhanan, kun moabot na gyod ang imong kataposan, di gyod ni mapugngan.”

Mao ray nasulti sa pulis ngadto sa iyang kauban, kinsa ning tungora namunit sa mga napasad nga dokumento ug mga papel de banko tupad sa naukab nga attachè case nga gigunitan pa gihapon ni Marta. (Kataposan)