Secret admirer

Gula 2

Misamot ang katingala ni Carolyn kay sukad sa pag-abot niya sa restaurant wala gayud siya makabantay nga adunay tawo nga nagsul-ob og barong-tagalog nga maoy sagad isul-ob sa mga abogado.

“Sa ato pa, dinhi diay si Atty. Razon sa akong pag-abot ganina? Diin siya dapit naglingkod? Unsay iyang gisul-ob?” giingnan ni Carolyn ang kahera sa nagpusot-pusot niya nga pangutana apan mipahiyom lang kaniya ang cashier.

Nakapahiyom na lang si Carolyn ug nahimo nga dako’ng tanghaga kaniya kun kinsa g’yud si Atty. Razon. “Tan-aw nako miss, secret admirer nimo si Atty. Razon kay wala man niya himoa sa uban ang paglibre.”

Pagka-ugma, wala maka-lunch si Carolyn didto sa suki niya nga restaurant kay naapikehan siya sa oras samtang naghimo og research didto sa library sa Palace of Justice. Didto na lang siya nag-lunch sa IBP canteen.

Dunay daghang kustomer sa uban nga mga lamesa ug nasabot ni Carolyn nga sila mga abogado kay nagsul-ob man og barong-tagalog. Nagduko lang si Carolyn nga nagkaon kay nagtuo siya nga siya ra ang gitutokan sa mao nga mga abogado. Wala magdugay si Carolyn kay gusto siya nga makabalik dayon sa library aron mahuman ang iyang gi-research kay gamiton kini sa hearing sa kaso unya sa Biyernes. “Pila ang ako miss,” gipangutana ni Carolyn ang cashier.

Mipahiyom kaniya ang kahera. “Miss, wala ka nay bayranan kay dunay mibayad sa imong gipang-order.”  Nahingangha si Carolyn. “Kinsa man? Si atorni Raymond maoy mibayad,” matud sa cashier.

Walay nahimo si Carolyn gawas sa paglakaw na lang paingon sa gawas.

Nakabantay siya nga ang mga abogado nga nanglingkod sa unahan sa iyang lamesa mikalit lang sa pagkahilom. (Sumpayan)