Gula 6
Ingon sa dili gayud makatuo si Elmer sa gitug-an kaniya ni Grace nga gidamgo siya sa dalaga. "Kun mao kana Grace, tinuod g'yud diay ang gisulti sa akong namatay na nga apohan?" ni Elmer pa nga nagpahiyom. Gitug-anan ni Elmer si Grace nga gidamgo usab niya ang dalaga atol sa iyang pagkatulog diha nga gikan sila nga mitambong og disco. Gibali niya ang iyang unlan kay nahinumdom siya sa gisulti sa iyang apohan.
"Kun balihon gud kuno nimo ang imong unlan Grace, kadtong tawo nga imong gidamgo, magdamgo usab nimo, ug mao kana ang akong gihimo," pasabot ni Elmer ngadto ni Grace. Pareho sila nga nagkataw-anay.
Nagdungan sila'g kaon si Grace ug Elmer kay nakaluto na man ang iyang mga ginikanan. Sa basketball court sa unahan, madungog nila ang hugyaw sa mga nagduwa. Wala’y puas ang ilang pagsultihanay.
"Unsa kaha'y buot ipasabot adtong atong damgo Mer no? Nganong nagdamgo man ta sa usa'g-usa?" gisukna ni Grace si Elmer. Nakahuna-huna si Elmer nga komedyahan niya ang dalaga.
"Basin og pareho ka nako Grace nga na-in love?" ni Elmer nga mitutok sa dalaga ug gitan-aw niya kun unsay reaksyon. Miduko si Grace, ingon sa wala makaharong pagtan-aw kang Elmer.
Nahimong pormal ang ilang pagsultihanay samtang nag-atubang sa gamay'ng lamesa daplin sa bentana. "Bitaw Grace, ang tinuod, sa una ko pa lang pagkakita nimo kagahapon didto sa bus terminal, nakabatyag ko nga I feel crush with you. Sa laktod, na love at first sight."
Mipahiyom og hilaw si Grace nga mora'g gibati'g kauwaw. "Manuroy ta sa basketball court Mer," agni ni Grace sa ulitawo. Nasabot ni Elmer nga dili pa gusto nga motubag kaniya si Grace sa iyang pagpanguyab.
Samtang sila naglakaw daplin sa karsada, gisuwayan ni Elmer, giagbayan niya ang dalaga. Wala kini masuko sa iyang gihimo ug gani migunit pa kini sa iyang mga kamot. (Sumpayan)