Alas dos sa hapon. Nibagting ang telepono sulod sa bupete ni Atty. Kenneth Alim. Ang naa’s opisina si Daisy, kapikas sa abogado nga mao ra say sekretarya. Si Kenneth bag-o lang nibiya kay may gitambongang bista. “Alim Law Office, good afternoon” ni Daisy sa pagpunit sa telepono. “Hello. Naa si Atty. Alim?” sa pikas linya. Tingog sa lalaki. “Wala pa, sir. Ngano man unta?” ni Daisy. “Mogawas na man sa ospital ang bata nga iyang naligsan. Nagkinahanglan na mi’g kuwarta para ibayad. Amahan ni sa bata” sa pikas linya.
Gikulbaan dayon si Daisy. Wa siya nagdahum nga nakadisgrasya diay ang iyang bana. Ug wa lang nisulti niya. Apan sa laing bahin, basi’g nasayop lang ning nagtawag. O kaha gustong mangilad. Gitubayan una niya. “Kanus-a ug diin ni mahitabo? Ug unsang orasa?” ni Daisy. “Niadtong niaging Biyernes. Usa ka semana na karon. Sa Danao, alas dos sa hapon” sa pikas linya. Nakapanghupaw si Daisy. Safety iyang bana. Kay anang adlawa, nitambong og MCLE Seminar.
“Nganong nakaingon man ka nga si Atty. Alim ang nakadasmag o nakaligis sa imong anak?” ni Daisy nga nagduda na nga nangilad ang nagtawag. ‘Nibilin man siya’g tarheta nako” sa pikas linya. Naglibog og samot si Daisy. “Unsa mang sakyanana ang nakaigo sa imong anak?” dugang ni Daisy. Mora na siya’g abogado nga nag-cross-examine og testigo. “CRV nga puti. May plate number nga WJU-447” sa pikas linya. Nasinati ni Daisy ang maong sakyanan. Ang ilang kotse Toyota Corolla nga abuhon. Ang CRV kang Dr. Owen Perez, ilang silingan. Nahuwasan sa kakulba si Daisy. Tingale sa karatol sa doctor human sa hitabo, tarheta ni Kenneth iyang nahatag sa amahan sa biktima.
“Dili si Atty. Alim ang nakadasmag sa imong anak. Tarheta lang niya ang nahatag nimo. Nalipat lang tingale si Dr. Perez. O kaha gipanghambog niya nga naa na siya’y abogado daan kon mokiha ka. Apan di bale, hatagan tika sa kontak number ni Dr. Perez” ni Daisy.
Nakapanarapo siya sa singot pagbutang niya sa telepono. Di sab lalim kon matinood nga nakadisgrasya iyang bana. Wa pa sila’y tinigom. Maglisod man gani sila usahay sa pagbayad sa abangan sa opisina. Bag-o pang abogado si Kenneth. Gagmay pa ilang duha ka anak babaye.