Gikulbaan ko. Nagkaduol na gayud ang daw yawa ug bangis nga kalayo sa among balay. Gihakot na sa akong mga anak ug asawa ang pipila namo ka mga butang sama sa mga sapot, ref, LED TV, laptap ug giariya sa luwas nga dapit nga dili na maabot sa dakong sunog nga mikaylap sa among barangay. Mao kini ang labing dako nga sunog sa siyudad. Lalim bay unom ka sityo ang gitilaan sa maong sunog ug naugdaw ang tanang kabalayan.
Naseguro kong maapil na gayud sa pagkasunog ang among balay kay ang duha ka trak sa bombero nga nagpundo sa dalan duol sa among balay, nahutdan na man sa ilang mga tubig. Mihubas na sab ang mga water hydrant sa MCWD.
Ang mga bombero nga mipuwesto pagkatkat sa dakong punoan sa karaang lumboy kilid sa akong balay, nanganaog na, human mahutdi og tubig ang ilang mga trak. Mao say akong pagtuo nga maapil sab pagkasunog ang dakong punoan sa karaang lumboy nga sulod sa 30 ka tuig, naghatag og landong sa among balay.
Gibati ko’g kahibulong nga ginuntan sa kalipay. Kalit lang nga may mitunga nga trak sa bombero nga misulpot kilid sa nahimutangan sa dakong punoan sa lumboy. Wala’y tatak ang trak sa bombero kon asang fire station kini gikan. Naaninaw ko nga abtik kaayo ang mga bombero nga pulos puti ang panagway ug mipasirit dayon sa dagko nilang hose nga mibuga sa tubig paingon sa bangis nga kalayo nga nagsingabot na gayud sa among balay. Paspas ang ilang pagpasirit!
Napalong ang kalayo nga wa gayud makasunog sa among balay. Hilabihang lipaya sa akong asawa ug mga anak nga napalong ra gayud ang bangis nga kalayo. Ang mga molupyo nga nagpundok ug nagbahasbahas sa dalan, nakasinggit usab sa kalipay.
“Milagro! Salamat sa Ginoo! Napalong ra gayud ang dakong sunog!” Nakadayeg ug nakabilib ko sa maong trak sa bombero uban sab sa abtik niining mga bombero.
“Sir, kauban ba ninyo kanang trak sa bombero nga kalit lang mitunga nga maoy nakapalong sa bangis nga kalayo....?” gipangutana ko ang usa ka dakodako sa bombero diha sa nagparking nga duha ka trak sa bombero nga nahutdan og tubig.
“H-ha? Wa may laing trak sa bombero nga miabot, Bosing!” tubag sa dakodako sa bombero nga milingi nako.
“Nahibulong bitaw mi nga kalit man lang napawong ang bangis nga kalayo, nga nahutdan man unta og tubig ang duha namo ka trak....!”
Natingala ko. Nahanaw tuod pagkalit kadtong trak sa bombero nga nakita kong kalit lang miabot ug mipasirit sa ilang dagkong hose sa nagbusagak nga tubig.
Maoy mipuli ang nagbuntaog nga dakong punoan sa karaang lumboy sa kilid sa natad sa among balay nga wa gyud masunog. Bida, lisod ipasabot sa kadaghanan ang akong nasaksihan uban sa akong pagtuo. Trak sa bombero sa mga engkanto ang akong nakita ganiha nga wala diay makita sa kadaghanan. Ako lang ang bugtong nasayod nga ang dakong punoan sa karaang lumboy, pinuy-anan sa mga engkanto. (Kataposan)