Uyab kontra sa mama

Power DJ Inday Misyel,

Tawaga lang ko sa pangalan nga Vanix, 18 years old. Ang akong problema bahin sa akong kapuyo nga four years na kami nga nag-ipon, unya namabdos siya apan nakuhaan. Akong gidala sa hospital, paggawas, giingnan ko sa akong mama nga magbuwag mi’ng duha. Gipapauli nako ang babaye sa Negros kay gikontrahan siya sa akong mama kay ngil-ad kuno og batasan. Ning bag-o mitawag ang kanhi nako kapuyo nga mobalik siya diri sa amo. Unsa may akong buhaton nga gikontrahan man siya sa akong pamilya? Love kaayo nako siya. - Vanix

Power Vanix,

Bisan og kontra sa pamilya nimo ang imong kapuyo, apan ikaw mismo ang nakakita sa kamahinungdanon niya diha sa imong kasingkasing. Ug kon ang imong kasingkasing padayon sa pagmahal ngadto kaniya, nagtuo ko nga hatagan ka og gasa sa God sa imong gipakita ug gibuhat. Hatagi lang usab og kahigayonan ang babaye sa iyang kaugalingon nga mag-usab, sultii siya nga kinahanglan magbinuotan ug ipadayon ang pagpaubos alang sa kahusay ug aron madawat siya sa imong pamilya. Dili usa nimo siya hukman dayon tungod lang sa sulti sa imong ginikanan. Ug aron masayod ka, normal lang sa inahan nga mamili kon kinsa ang ilang mahimong manugang pero anaa kanimo ang tanang desisyon. – Inday Misyel

Mapaminaw ko ninyo sa DYKC gikan sa alas 10:30 – 12:00 sa gabii ug makita usab sa USTREAM.TV. I search lang ang RPNDYKC675 para sa akong radio show.