Nabasa ni Rex ang kasubo ni Marian diha sa iyang panagway. Nakasabot si Rex nga ang nakapasubo ni Marian mao ang gisulti sa doktor nga angay’ng operahan dayon ang iyang inahan kay kuyaw kon makabuto ang apendisaytis sa ilawom sa tiyan.
“Mangadto ta sa entrance sa ospital basin anaa na si tiyo. Nakadala ba kaha ‘sab kadto og kuwarta,” matud ni Marian. Muabot na og kapin sa oras ang ilang pagpinaabot didto sa ganghaan sa ospital apan wala pa gayud muabot ang uyoan ni Marian.
Kalit lang nga may mipikpik sa abaga ni Rex. Paglingi ni Rex, ang higala diay niya nga si Konsehal Roy Melgo nga nagpahiyom. “Kumusta na ang imong mama?” matud sa konsehal nga mibanus-banos sa pagtutok kanila ni Rex ug Marian.
“Nakatulog na tawon si mama nako konsehal. Salamat kaayo sa imong pagtabang,” matud ni Rex nga puwerte’ng nakapasalamat sa opisyal sa ilang lungsod. “Basin matabangan nimo ang akong amiga konsehal Roy, taga Barangay Lugo ni sila,” matud ni Rex dungan sa pagpaila-ila ni Marian.
Nakasabot si Konsehal Melgo sa problema ni Marian. “Ah sige, wala’y problema, ako usa’y palit anang gikinahanglang tambal sa imong inahan ug bayri lang unya ko kon moabot na ang imong tiyo,” matud sa konsehal nga miagni dayon nga paliton ang tambal sa botika.
Tuod, nasulbad ang problema ni Marian. Naoperahan g’yud dayon ang inahan sa dalaga bisan og wala pa mahiabot ang iyang uyoan nga maoy nangita’g kuwarta. Pagkaugma na sa buntag nga miabot ang tiyo ni Marian kay dugay diay nga nahalin ang ilang binuhi nga baka didto sa Barangay Don Gregorio Antigua.
“Dako kaayo ko’g utang kabubot-on nimo Rex ug ni Konsehal Melgo,” giingnan sa dalaga ang iyang higala samtang nagdungan na usab sila pagpangaon sa kan-anan atbang sa ospital. (Sumpayan)