Jezebel - Gula 22
“Makalagot man siya,” ni Edward pa. “Lisod man kaayo siyang pasabton ug arogante pa maong akong gibirahan.”
“Unsaon na man lang kon ikiha ka sa iyang mga ginikanan?” Gipangutana ko siya uban ang kabalaka. “O ba kaha mahibaw-an ang nahitabo ninyo sa atong mga magtutudlo. Tingali’g mangadaot mong duha ning inyong kalaki.”
“Bahala na kon unsay mahitabo.”
“Moingon ka lang niana?” Mag-unsa na man lang ko?”
“Pasensiya na, Jezebel. Wala ko lang kapugngi ang akong kaugalingon. Bation ko gyud ang insecurity kon dunay laing lalaki nga mangulitawo nimo.”
“Nganong ma-insecured ka man? Dili ba giingnan ko na man ikaw nga wala’y laing manag-iya nako gawas lang nimo?”
“Tinuod kana. Pero samtang dili ko pa ikaw maangkon sa hingpit, Jezebel, dili pa usab mawagtang ang akong insecurity. Dili ko kapugngan ang magselos.”
Nangayo’g pasaylo si Edward kanako sa iyang pagpakigsinumbagay kang Jerome. Misaad siya nako nga dili na siya mousab sa paghimo sa ingon. Sama nako, dili sab diay siya buot nga mahilambigit sa eskandalo ang among relasyon. - Sumpayan pa
- Latest
