Gikahinangop kaayo ni Rizza Mae nga nakahigala siya og taga radyo. Gikan niadto, kanunay na sila nga magbayloay og mga text messages si Elly. Sanglit mahigalaon kaayo si Elly kang Rizza Mae, dali ra kaayo sila nga nagkasuod.
Usa ka adlaw, giteksan si Rizza Mae ni Elly ug gipahibalo nga mopasundayag sila og linawas nga drama sa usa ka barangay sa Carcar kabahin sa pagsaulog sa ilang fiesta. Gidapit si Rizza Mae ni Elly nga paubanon sa Carcar.
Tuod, nananghid si Rizza Mae sa iyang mga ginikanan nga motan-aw sa drama sa Carcar. Gidala ni Rizza Mae ang iyang ig-agaw nga babaye aron aduna siya’y kauban. Komedyante gihapon maoy papel ni Elly sa drama.
Misamot ang panagsuod ni Elly ug Rizza Mae. Sangko sa langit ang iyang kalipay kay nahigala usab sa dalaga ang mga kauban ni Elly nga mga dramatorgo sa radyo. Human sa pasundayag, didto sila sa balay sa kapitan nga maoy nag-andam og pagkaon.
“Sige dayon mo, ayaw lang kaikog. Inato ra ning giandam nako nga midnight snack. Kagumkom kaayo na’ng chitsaron sa Carcar nga bag-o pa’ng haon,” matud sa kapitan. Gipaila-ila ni Elly si Rizza Mae ngadto sa kapitan kay nakasabot siya nga nahibulong ang kapitan kay wala kini moapil sa drama.
“Misis nako ni Kap.. si Rizza Mae,” paila ni Elly. Mipahiyom ang kapitan ug gilamano si Rizza Mae. Dihang nakatalikod na ang kapitan, gisiko paghinay ni Rizza Mae si Elly. “Imo man nga giingnan nga misis ko nimo?” matud ni Rizza Mae nga nagngisi.
“Sori ha, pero garbo kaayo ko nga ipaila ka nga akong misis kay guwapa ka man gud,” matud ni Elly. Nagtupad sila si Elly sa pagpangaon. “Mas maayo pa Ly nga tudloan nimo na si Rizza Mae sa pag-acting aron nga kon dunay absent sa grupo siya ang makapuli,” matud sa kaubang dramatorga ni Elly.
“Tuod no? Sige tudloan unya nako si Rizza Mae,” matud ni Elly. (Sumpayan)