Amor ayaw gyud og kompiyansa nianang mga lalake day, kay kanang mga lalake, mga Hudas na sila. Mga mabudhion, ang ilang halok sama na sa halok ni Hudas.”
Kanang paghimangno ni Uray Juana niya ingon sa tinuod gyud. Ang iyang ig-agaw nga si Belen gipamabdosan ni Nonie, wa intawon pakasli. Si Lita nga ilang silingan nga gikan sa Manila nagdala og bata nga wala’y amahan nga miunong. Mao nga kumbinsido gyud siya nga ang gisulti ni Uray Juana niya tinuod. Mao nga maglikay-likay siya sa mga lalake.
Apan usa ka higayon niana samtang namalit siya sa mall, natagak diay ang iyang ID “Miss dia ra ang imong ID Miss O Amor Ferrer diay ang imong pangalan Miss? Makahuluganon kaayo ang imong pangalan Miss Amor, Gugma, unya Ferrer, Balaan. Sa ato pa gugmang balaan. Aw ako diay si Bart Segovia Miss Amor amiga nata ha? “Aw oo ba!” Sanong ni Amor.
Sukad niadto nagkasuod ang duha. Gani nahimong ka textmate ni Amor si Bart. Kanunay na silang magkuyog mamalit ug manuroy sa plaza.
Usa ka higayon niana samtang nanuroy sila sa plaza gipadayag ni Bart ang iyang gibati ni Amor. ‘I love you Amor, ikaw lang ang babaye nga akong mahalon sa tibuok kong kinabuhi. Bisan pa’g ulangon kita sa halapad nga kadagatan ug libutan sa dagkong kabukiran dili ug dili kini makababag sa akong paghigugma kanimo”.
Tungod sa matam-is nga mga pasalig ni Bart gidawat ni Amor ang iyang gugma. Dinhi misamot ang ilang panagsuod. Hapit kada gabii silang manuroy sa plasa. Gani ang katahom sa palibot sa plasa maoy nahimong saksi sa mga matam-is nga halok ni Bart kang Amor.
Usa ka gabii niana samtang nanuroy sila si Bart ug Amor sa plasa, niay gisumbong si Amor kang Bart.” Bart, nagsabak nako duha na kabulan nga wa moduaw ang binulan kong bisita, nahadlok ko Bart.” “Mao ba sa ato pa amahan na diay ko? Dayong gakus ni Bart kang Amor ug gihagkan siya.
Ugma dayon mouli ko sa probinsiya aron dad-on nako ang akong mga ginikanan aron pakaslan ka Amor.” Pasalig ni Bart kang Amor.
Milaum si Amor sa mga pasalig ni Bart. Ang mga adlaw nahimong mga semana, ug ang mga semana nahimong mga bulan, nanganak nalang si Amor way Bart nga mibalik aron tumanon ang iyang mga saad.
Dinhi nahinumdom si Amor sa mga pasidaan ni Uray Juana niya nga magbantay sa mga lalake, kay ang mga lalake mga mabudhi-on, ug ang ilang mga halok sama sa mga halok ni Hudas. (Katapusan)