Ang komedyante - Gula 2

Nakaamgo na g’yud si Rizza Mae nga siya ang gipasabot sa komedyante nga kunohay maoy nahimo niya nga girlfriend. Mipasalipod g’yud si Rizza Mae sa babaye nga diha sa iyang atubangan.

Apan ang mga tawo nga pareho’ng nagngisi, diha na nagsud-ong kang Rizza Mae. “Klaroha kon hain ana ang imong uyab?” pangutana sa kauban sa komedyante.

Maayo kaayo nga mihiko-hiko sa lawas ang komedyante nga nakapasamot kaniya nga kataw-anan. “Mitago man siya. Mauwaw lagi siya nga ipanabi ang among relasyon,” matud sa komedyante nga mora’g binata ang tono sa sinultihan.

“Bi adtoa kuno aron g’yud motuo ang mga tawo nga nauyab nimo ang mao nga babaye,” mora’g gihagit g’yud ang komedyante sa iyang kauban. Kunohay, ang komedyante kalakwunon-dili, hinay kaayo ang iyang pagsibog.

Mihugyaw pagsamot ang mga tawo. Mora’g gipaningot sa kakulba si Rizza Mae kay sa iyang paglingi, diha gayud mopaingon sa iyang nahimutangan ang komedyante.

Gihikap na g’yud sa komedyante si Rizza Mae nga nakapahugyaw kaayo sa mga nanan-aw sa variety show. “Sorry ha, lingaw-lingaw ra ni. Ako diay si Elly,” matud sa komedyante.

Mipahiyom og hilaw si Rizza Mae diha nga gilamano siya ni Elly, ang taga radyo nga komedyante sa variety show. Mibalik pagsaka sa stage ang komedyante ug kadto maoy nagtapos sa kalingawan.

Nag-iya-iya pagpanglakaw ang mga nanan-aw sa variety show, apan si Rizza Mae ug pipila ka mga tawo wala gihapon mamiya sa atubangan sa stage.

Takulahaw lang nga adunay mihikap sa abaga ni Rizza Mae gikan sa iyang luyo. “Sorry ganina ha? Kabahin lang kadto sa kalingawan, apan puwede ra ‘sab tinud-on,” matud ni Elly nga mao diay ang miduol sa dalaga.

Nakailis na si Elly sa iyang sapot mao nga wala dayon siya mailhi sa nahabilin nga nanan-aw. “Komedyante kaayo ka uy, nauwaw baya kaayo ko ganina kay gitan-aw ko’s mga tawo,” matud ni Rizza Mae.

Nangayo si Elly og contact number ni Rizza Mae sa wala pa sila mobiya. (Sumpayan)