Gula 5
Puwerte’ng lipaya ni Melody nga nakaangkon siya og bag-o ug nindot nga selpon gikan kang Narding nga bag-ohay pa lang niya nga nakaila.
Gipalitan pa g’yud siya ni Narding og P500 nga load mao nga misamot ang kalipay ni Melody. Misulod sila og kan-anan kay hapit na mo alas siete sa gabii. Samtang nagpaabot sa ilang order, wala’y puas ang pagsige’g pahiyom ni Melody nga nagsige’g pindot-pindot sa bag-o niya’ng selpon.
Nangaon sila si Melody ug Narding. “Gisuwerte g’yud ko da nga nagkaila ta kay nakabag-o ko’g selpon,” giingnan sa dalagita si Narding. Nasabtan ni Narding nga sangko sa langit ang kalipay ni Melody ug tingali dili na kini mobalibad kun iyang hagdon og pakigpanuroy.
“Gikan dinhi, gusto ko nga manuroy ta, gusto ka ba?” gisukna ni Narding ang dalagita. “Asa man ta manuroy?” matud ni Melody. Tukma kaayo nga bildo ang bungbong sa restaurant nga ilang nahimutangan ug makita niini ang kabukiran.
“Adto ta nianang mga lugara nga makita nato gikan dinhi, kanang nindot kaayo og mga suga,” iyang giingnan si Melody dungan sa pagtutok sa bukid. “Sige, ikaw bahala, basta dili lang ‘sab ta kaayo magdugay,” ni Melody pa.
Human nila og kaon, nanggawas dayon sila ug miadto sa giparkingan ni Narding sa iyang motorsiklo. Tungod kay dako man og power ang motor ni Narding, paspas kaayo kini nga mitungas sa bukid hangtud nga miabot sila sa TOPS.
Mingaw pa kaayo sa mao nga dapit, wala pa’y laing mga tawo. “Kanindot dinhi’ng lugara no? Bugnaw lang kaayo,” matud ni Melody. “Nakakita ka niadto’ng mga suga nga nagporma og square, mao kana ang SM nga didto ta bag-o lang.
“Hala, mora lang og bag-o pa kaayo ta didto ug karon dia na ‘sab ta dinhi no?” matud sa mapahiyumon nga si Melody. “Abi nimo Melody, suwerte kaayo ko nga ako ka’ng nakauban karon kay ibog kaayo ko nimo ganina nga nagtan-aw didto sa bakeshop,” ni Narding. (Sumpayan)