Herbal soup

Kada adlaw anha mi mamahaw sa Cherry’s Karenderya sa Capitol Site. Alas sayis ngadto sa alas sayis i medya sa buntag kasagaran among iabot gikan sa lungsod sa Carmen.

Tulo ka semana na mi nga suki sa maong karenderya. Akong lolo Charlie, Lola Mira ug ako. Nia man gud ko  mag-eskuyla sa SDA Elementary  School atbang sa Kapitolyo. Mogikan mi’g alas singko sa buntag sa Carmen. Anha lang ko tiwas og katulog sa sakyanan. Unya inig pauli mahapon, mamawi sab ko’g katulog sa sakyanan gihapon. Lunes ngadto sa Biyernes.

Si Lolo Charlie ang drayber namo sa Toyota Corolla nga abuhon. Suportado mi’g panggasolina ni Tita Myrna. Si Lola Mira akong yaya sa eskuylahan. Sa pagkaon, si Tita Maricor ang tighatagan og kuwarta.  Ipon man gud ko nila kay buwag akong papa’g mama. May lainlain nang pamilya. Malipay na lang sab akong mga apohan nga may gikalingawan sila sa ilang pag-retire. (Ang pag-atiman nako).

“Lira, mamauli na ra ba mi’g Carmen ni lola nimo. Kay nang-retire na mi. Balhin sab ka’g tungha sa Carmen?” ni Lolo Charlie usa ka hapon sa diha pa mi puyo sa Guadalupe. Nag-abang sila’g balay sa diha pa sila magtudlo sa Guadalupe Elementary School.

“Di lang ko mobalhin og tungha sa Carmen, lo. Grade 4 na gud ko. Maglisod na ko’g adjust sa bag-ong mga klasmets ug higala” nako pa nga kahilakon. Kay pinangga kaayo ko’s akong mga apohan, niagwanta sila’g biyahe kada-adlaw, alang lang nako.

Tinolang isda gyud ang sud-an nilang lolo ug lola kada buntag. Unya hutdon gyud ni lolo og higop ang sabaw. Hasta ang sabaw nga sobra ni lola. “Lo, nganong higopon man nimo ang sabaw sa tinola,” nako pa, usa ka buntag nga nakuryoso ko.

“Herbal soup ni Inday, alang nako. Nag-water therapy man ko. Ang sabaw tubig man sab. Ug mas sustansiyado pa. Kay may sambog nga sibuyas, tamatis, sili, tangad ug luy-a” ni lolo.

Nakapalig-on gyud tingale ni lolo ang sabaw sa tinola. Kay bisa’g taligsikan siya, dili sip-onon, dili ubhon ug dili hilantan. Basko’g gihapon. Bisa’g tiguwang na. (Katapusan)