Giluwas sa mangtas

Usa ka kilomkilom diin hilom pa ang sityo Bagakay may usa ka dalaga nga nanaog sa ilang balay ug milakaw kini paingon sa Nag-umbaw ang labing lawom nga bung-aw dinhi sa ilang balangay. Ang maong babaye mao si Conchita nga biktima sa limbong, kay dihang nagpaabot na siya didto sa simbahan alang sa seremonyas sa kasal kuyog sa lalaki nga iyang gimahal wala man kini motunga.

Ug matud pa mikuyog kuno og laing babaye nga maoy gihigugma niini.

Ug karon tungod kaha sa kauwaw ug sa kasakit nga iyang gihambin nia siya karon hinay nga naglakaw paduol sa lawom nga bung-aw. Magpakamatay si Conchita.

Unya kalit lang miambak ang dalaga sa lawom nga bung-aw aron matapos na ang tanan niyang problema ning kalibotan. Apan kalit lang may mikalit og sugat kaniya nga naglupad ug gisawo si Conchita kinsa hapit na mahiabot sa dagkong kabatoan sa ubos.

Dihang nakamatngon na’g maayong panimuot si Conchita maoy mibantang sa iyang panan-aw si Gariong, ang anak sa magtiayong Bugkoy ug Aniana, nga gidungogdungog nga mga ungo dinhi sa balangay may nakakita nga nagtuwad ug unya gisuyop pa gyud ang dugo sa baboy ni Otik nga tigluto og adobo sa eskina.

“Nia ka sa akong payag, Conchita,” ni Gariong pa. “Nganong buot ka mang magpakamatay? Tungod ba sa gibuhat ni Aurelio? Kabatan-on pa nimo nga imong hunosan ang imong kinabuhi?”

Mitulo ang mga luha ni Conchita nga wala motingog. Miluom kini sa paghilak. Naluoy si Gariong sa dalaga kay sa hilom usab duna man siya’y hilom nga gugma sa dalaga, ugaling lang naunhan siya ni Aurelio. “Sige lang, Conchita, makabawos ra ka kang Aurelio...”

Tuod pagka-ugma, hipalgan ang ulo ni Aurelio diha sa may kinatumyan sa tulay paingon sa nagbung-aw, ug ang iyang lawas natusaktusak sa mga talinggab didto sa ubos sa bung-aw nga lawom.

“Conchita, nakabawos ka na kang Aurelio,” ni Gariong pa mitaho sa dalaga bahin sa  nahitabo ni Aurelio. Nakit-an ang iyang putol nga ulo sa may tulay ug ang iyang lawas didto sa kinaubsan sa bung-aw nga naguhayguhay sa mga talinis nga mga tuod..”

“Apan, kinsa may naghimo ini?” kahilakon si Conchita. Wala motingog si Gariong. Unya nianang pagka-gabii nadungog ni Conchita ang langgis kaayong tingog sa wakwak diha sa ilang tungod. Pagka-taudtaod nabati niya ang tingog ni Gariong nga nangatahoran kay mamisita sa dalaga. (Kataposan)